ന്യൂഡൽഹി: ടോക്കിയോവിൽ ഈ മാസം അവസാനം ആരംഭിക്കുന്ന പാരാസിമ്പിക്‌സിൽ പങ്കെടുക്കുന്ന താരങ്ങൾക്ക് ആത്മവിശ്വാസം പകർന്ന് കേന്ദ്രകായിക മന്ത്രി അനുരാഗ് ഠാക്കൂർ. ഒളിമ്പിക്‌സിൽ ഇന്ത്യൻ നിര നടത്തിയ ഐതിഹാസിക പ്രകടനത്തെ വെല്ലുന്ന പോരാട്ടം പാരാലിമ്പിക്‌സ് താരങ്ങൾ നടത്തുമെന്നതിൽ ഉറപ്പുണ്ടെന്ന് കേന്ദ്രകായിക മന്ത്രി പറഞ്ഞു.
ഇന്ത്യൻ പാരാലിമ്പിക്‌സിന് പുറപ്പെടുന്ന താരങ്ങൾക്കും ഉദ്യോഗസ്ഥർക്കും യാത്ര അയപ്പ് നൽകുന്ന യോഗത്തിലാണ് കേന്ദ്രമന്ത്രി ആത്മവിശ്വാസം പ്രകടിപ്പിച്ചത്. കേന്ദ്ര മന്ത്രിമാരായ ജി.കിഷൻ റെഡ്ഡി, മീനാക്ഷി ലേഖി, പാരാലിമ്പിക്‌സ് സെക്ട്രട്ടറി ജനറൽ ഗുരുഷരൺ സിംഗ്, പ്രസിഡന്റ് ദീപാ മാലിക് എന്നിവരും താരങ്ങൾക്ക് ആശംസ നേർന്നു.
ഇന്ത്യൻ താരങ്ങൾ ചരിത്രം കുറിയ്‌ക്കുമെന്ന് ദീപാ മാലിക് പറഞ്ഞു. ആകെ 9 ഇനങ്ങളിലായി 54 പേരാണ് ടോക്കിയോവിൽ മത്സരിക്കാനിറങ്ങുന്നത്. ഇതിൽ 24 പേരും ലോക റാങ്കിംഗിലെ ആദ്യ മൂന്ന് സ്ഥാനത്തുള്ളവരാണ്. ഇവർക്കെല്ലാം മെഡൽ സാദ്ധ്യതയുണ്ടെന്നും ദീപ മാലിക് പറഞ്ഞു. ആഗസ്റ്റ് 24 മുതൽ സെപ്തംബർ 5 വരെയാണ് ടോക്കിയോവിൽ പാരാലിമ്പിക്‌സ് നടക്കുന്നത്.
