മുംബൈ: ഇന്ത്യയിൽ ഹോണ്ട അമേസ് 2021 ഫെയ്സ്ലിഫ്റ്റിന്റെ വില പ്രഖ്യാപിച്ചു. മുൻഗാമിയുടെ അതേ എഞ്ചിൻ ഓപ്ഷനുകളാണുള്ളതെങ്കിലും പുതിയ മുഖച്ഛായയോടെയാണ് അമേസിന്റെ വരവ്. വിലയുടെ കാര്യത്തിലും നേരിയ വ്യത്യാസമാണുള്ളത്. പെട്രോൾ വെരിയന്റിന് 6.70 ലക്ഷം മുതൽ 9.50 ലക്ഷവും, ഡീസൽ വെരിയന്റിന് 8.90 ലക്ഷം മുതൽ 12 ലക്ഷം വരെയാണ് വില(എക്സ്- ഷോറൂം വില).
ജാപ്പനീസ് വാഹന നിർമ്മാതാക്കളായ ഹോണ്ട ഈ മാസം ആദ്യം പുതിയ അമേസ് ഫെയ്സ്ലിഫ്റ്റിന്റെ ബുക്കിംഗ് ആരംഭിച്ചിരുന്നു. ടോക്കൺ തുകയായ 5,000 രൂപക്ക് ഓൺലൈനായോ, അല്ലെങ്കിൽ 21,000 രൂപക്ക് ഹോണ്ട ഡീലർഷിപ്പ് വഴിയോ വാഹനം മുൻകൂട്ടി ഓർഡർ ചെയ്യുവാനുള്ള സൗകര്യമാണ് ഒരുക്കിയിരുന്നത്.
ഇ, എസ്, വിഎക്സ് എന്നിങ്ങനെയാണ് ലഭ്യമാകുന്ന വെരിയന്റുകൾ. 3 വർഷത്തെ അൺലിമിറ്റഡ് കിലോമീറ്ററും 10 വർഷത്തെ എനിടൈം വാറന്റിയും ഇതിനോടൊപ്പം നൽകുന്നു.
പുതിയ അമേസിന് 18.6 കിലോമീറ്റർ പർ ലിറ്റർ ശേഷിയുള്ള 1.2 ലിറ്റർ ഐ-വിടിഇസി പെട്രോൾ എഞ്ചിനും, 24.7 കിലോമീറ്റർ പർ ലിറ്റർ ശേഷിയുള്ള 1.5 ലിറ്റർ ഐ-ഡിടിഇസി ഡീസൽ എഞ്ചിനുമാണുള്ളത്.
ഈ സെഡാൻ മോഡലിന് പുതിയ അപ്ഹോൾസ്റ്ററി, 7-ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, ആൻഡ്രോയിഡ് ഓട്ടോ, ആപ്പിൾ കാർപ്ലേ, വോയ്സ് കമാൻഡ് ആക്ടിവേഷൻ, മൾട്ടി വ്യൂ സംവിധാനമുള്ള റിയർ പാർക്കിംഗ് ക്യാമറ, പുഷ്-ബട്ടൺ സ്റ്റാർട്ട്, ഓട്ടോമാറ്റിക് എസി തുടങ്ങിയവ ലഭിക്കും.
പ്ലാറ്റിനം വൈറ്റ് പേൾ, റേഡിയന്റ് റെഡ്, മെട്രോയിഡ് ഗ്രേ, ലൂണാർ സിൽവർ, ഗോൾഡൺ ബ്രൗൺ എന്നിങ്ങനെ 5 വ്യത്യസ്ത നിറങ്ങളിലാണ് അമേസ് അവതരിപ്പിച്ചത്.
സൗന്ദര്യവർദ്ധക അപ്ഡേറ്റുകളായ പുതിയ ഗ്രിൽ, എൽഇഡി പ്രൊജക്ടർ ഹെഡ്ലൈറ്റുകൾ, സംയോജിത എൽഇഡി ഡിആർഎൽ, എൽഇഡി ഫോഗ് ലാമ്പുകൾ, പരിഷ്കരിച്ച ബമ്പറുകൾ, 15-ഇഞ്ച് ഡയമണ്ട് കട്ട് അലോയ് വീലുകൾ, സി ആകൃതിയിലുള്ള എൽഇഡി ടെയിൽ ലൈറ്റുകൾ എന്നിവ ഈ മോഡലിന് ലഭിക്കും.
