ന്യൂഡൽഹി: കൊറോണ പ്രതിരോധ കുത്തിവെയ്പ്പിന്റെ രണ്ട് ഡോസുകളും എടുത്തവരിൽ 87,000 പേർക്ക് രാജ്യത്ത് രോഗ ബാധ സ്ഥിരീകരിച്ചതായി റിപ്പോർട്ട്. കൊറോണ നിരക്കിൽ ഏറ്റവും മുൻപന്തിയിലുള്ള കേരളത്തിൽ ഇരുഡോസുകളും സ്വീകരിച്ച 46 ശതമാനം ആളുകൾക്ക് രോഗബാധ സ്ഥിരീകരിച്ചുവെന്നും ദേശീയമാധ്യമം റിപ്പോർട്ട് ചെയ്തു.
കേരളത്തിൽ ആദ്യ ഡോസ് വാക്സിൻ സ്വീകരിച്ച 80,000ത്തോളം പേർക്കും രണ്ട് ഡോസുകളും സ്വീകരിച്ച 40,000 പേർക്കും കൊറോണ സ്ഥിരീകരിച്ചിട്ടുണ്ട്. രാജ്യത്താകെ വൈറസ് വ്യാപന നിരക്കിൽ കുറവ് സംഭവിച്ചിട്ടും കേരളത്തിൽ കൊറോണയുടെ പ്രതിദിന നിരക്ക് ഉയരുന്നതിൽ ആശങ്കയുണ്ടെന്നാണ് കേന്ദ്ര ആരോഗ്യ വകുപ്പിന്റെ നിരീക്ഷണം.
ആദ്യ ഡോസ് പ്രതിരോധ കുത്തിവെയ്പ്പ് നൂറുശതമാനം പൂർത്തിയാക്കിയ കേരളത്തിലെ വയനാട്ടിൽ പോലും പുതിയ കൊറോണ കേസുകൾ സ്ഥിരീകരിക്കുന്നുണ്ടെന്നും ആരോഗ്യവകുപ്പ് ചൂണ്ടിക്കാട്ടുന്നു. കഴിഞ്ഞ 24 മണിക്കൂറിനിടെ 21,000ത്തിലധികം പേർക്കാണ് സംസ്ഥാനത്ത് കൊറോണ റിപ്പോർട്ട് ചെയ്തത്.
