ശ്രീനഗർ : കശ്മീരി പണ്ഡിറ്റുകളുടെ സ്വത്തുക്കൾ സംരക്ഷിക്കുന്നതുമായി ബന്ധപ്പെട്ട് ഉത്തരവ് പുറപ്പെടുവിച്ച് ജമ്മു കശ്മീർ ഭരണകൂടം. 1997 ലെ മൈഗ്രന്റ് ഇമ്മൂവബിൾ പ്രോപ്പർട്ടി നിയമം 1997 കർശനമായി നടപ്പാക്കണമെന്നതുൾപ്പെടെയുള്ള നിർദ്ദേശങ്ങൾ അടങ്ങിയ ഉത്തരവാണ് റവന്യൂ വിഭാഗത്തിനായി പുറപ്പെടുവിച്ചിരിക്കുന്നത്. ഭീകരത ഭയന്ന് കശ്മീർ വിട്ട പണ്ഡിറ്റുകൾക്ക് സ്വത്തുക്കൾ തിരിച്ചു നൽകുന്ന നടപടികൾ നിലവിൽ പുരോഗമിക്കുകയാണ്.
കശ്മീരിൽ നിന്നും പലായനം ചെയ്ത പണ്ഡിറ്റുകൾ അവരുടെ പരാതികൾ അറിയിക്കാൻ പോർട്ടൽ രൂപീകരിക്കണമെന്ന് ഉത്തരവിൽ പറയുന്നു. 15 ദിവസത്തിനുള്ളിൽ ജില്ലാ മജിസ്ട്രേറ്റുമാർ കശ്മീർ പണ്ഡിറ്റുകളുടെ ഭൂമി സംബന്ധിച്ച വിവരങ്ങൾ ഭരണകൂടത്തിന് കൈമാറണം. മറ്റുള്ളവർ കയ്യേറിയ ഭൂമി സമയബന്ധിതമായി തിരിച്ചു പിടിക്കണമെന്നും ഉത്തരവിൽ നിർദ്ദേശമുണ്ട്.
അതേസമയം കശ്മീരി പണ്ഡിറ്റുകൾക്ക് വലിയ ആശ്വാസം നൽകുന്നതാണ് ഭരണകൂടത്തിന്റെ പുതിയ ഉത്തരവ്. ഭൂമി കയ്യേറ്റവുമായി ബന്ധപ്പെട്ട് നിരവധി തവണ ഇവർ സർക്കാരിനോട് ആശങ്ക പ്രകടിപ്പിച്ചിരുന്നു. ഈ ആശങ്കകൾക്കെല്ലാം ഇതോടെ വിരാമമാകുകയാണ്. ഭരണത്തിലേറിയത് മുതൽ കശ്മീർ പണ്ഡിറ്റുകളുടെ അവകാശ സംരക്ഷണത്തിനാണ് ബിജെപി സർക്കാർ കൂടുതൽ പ്രധാന്യം നൽകുന്നത്.
Comments