മൃഗസ്നേഹികളായ മനുഷ്യര് ധാരാളമുണ്ട്. മൃഗങ്ങളെ മറ്റെന്തിനെക്കാളും സ്നേഹിക്കുന്നവരുടെ കഥകള് ഒട്ടേറെ കേട്ടിട്ടുമുണ്ട്. എന്നാല് മൃഗങ്ങളുമായുള്ള ബന്ധം അതിരുവിട്ടാലോ… അതേ ബെല്ജിയത്തില് നടന്ന അത്തരത്തില് ഒരു സംഭവമാണ് മൃഗസ്നേഹികളെ ഞെട്ടിച്ചത്. ബെല്ജിയത്തിലെ ആന്റ്വെര്പ് മൃഗശാല ഒരു യുവതിക്ക് വിലക്ക് ഏര്പ്പെടുത്തിയിരിക്കുകയാണ്. മൃഗശാലയിലെ 38 വയസുള്ള ചിമ്പന്സിയുമായി യുവതി പ്രണയത്തിലായതാണ് കാരണം.
ചിമ്പന്സിയെ ഇനി കാണരുതെന്നാണ് അധികൃതരുടെ ഉത്തരവ്. തനിക്ക് ചിമ്പന്സിയെയും അതിനു തന്നെയും ഇഷ്ടമാണെന്നും തങ്ങള് തമ്മില് പ്രണയത്തിലാണെന്നും സമ്മതിച്ച യുവതി, തങ്ങളെ അകറ്റിനിര്ത്തുന്ന മൃഗശാലാ അധികൃതരുടെ നിലപാട് മനുഷ്യത്വവിരുദ്ധമാണെന്നും പറഞ്ഞു. ആദി ടിമ്മര്മന്സ് എന്ന സ്ത്രീയ്ക്കാണ് മൃഗശാല അധികൃതര് വിലക്ക് ഏര്പ്പെടുത്തിയത്. 38 വയസ്സുള്ള ചിറ്റ എന്ന ചിമ്പന്സിയുമാണ് യുവതി പ്രണയത്തിലായത്.
ടിമ്മര്മന്സ് ചിറ്റയെ കഴിഞ്ഞ നാലു വര്ഷമായി നിത്യവും സന്ദര്ശിക്കാറുണ്ട്. ഈ കാലത്തിനിടയില് ചിമ്പന്സിയും താനുമായുള്ള ബന്ധം ശക്തമായെന്നാണ് യുവതി അവകാശപ്പെടുന്നത്. ഇവര് പരസ്പരം കൈകള് കൊണ്ട് ആംഗ്യങ്ങള് കാണിക്കാറും ഫ്ളൈയിംഗ് കിസ് നല്കാറുമുണ്ട്. ഇത് അറിഞ്ഞശേഷമാണ്, മൃഗശാല അധികൃതര് യുവതിയ്ക്ക് വിലക്ക് ഏര്പ്പെടുത്തിയത്. ഇനി ചിറ്റയെ കാണാന് കഴിയില്ലെന്ന് യുവതിയെ അറിയിച്ചിരിക്കുകയാണ് അധികൃതര്. കൂട്ടത്തിലെ മറ്റ് ചിമ്പന്സികള് ചിറ്റയില് നിന്നും ഇതിനകം വിട്ടുനില്ക്കുന്നതായി അധികൃതര് പറയുന്നു.
അതേസമയം, ഈ ബന്ധം ചിമ്പന്സിക്ക് നല്ലതല്ല എന്നാണ് മൃഗശാല അധികൃതരുടെ അഭിപ്രായം. മനുഷ്യരുമായി പരിധിയില് കവിഞ്ഞ അടുപ്പമുള്ള മൃഗത്തെ മറ്റ് മൃഗങ്ങള് അടുപ്പിക്കാറില്ല. ചിറ്റ മറ്റ് ചിമ്പന്സികളുമായി കഴിയട്ടെ. സന്ദര്ശന സമയം കഴിഞ്ഞുള്ള 15 മണിക്കൂറും അവന് ചിമ്പന്സികള്ക്കൊപ്പമാണ് കഴിയേണ്ടത്. എന്നാല് ചിറ്റയെ ഇപ്പോള് അവ അവഗണിക്കുകയാണ്. സന്ദര്ശന സമയം കഴിഞ്ഞാല് അവന് ഒറ്റപ്പെട്ടാണ് കഴിയുന്നത്. അവന് സന്തോഷമായിരിക്കാനാണ് ഞങ്ങള് ആഗ്രഹിക്കുന്നതെന്ന് മൃഗശാല അധികൃതര് പറയുന്നു.
സന്ദര്ശകര് മൃഗങ്ങളുമായി വളരെയധികം ഇടപഴകുന്നത് സന്തോഷം തന്നെ. പക്ഷേ മൃഗങ്ങളുടെ സംരക്ഷണമാണ് മുഖ്യം. ചിറ്റയെ മൃഗശാലയിലേക്ക് 30 വര്ഷങ്ങള്ക്ക് മുന്പാണ് കൊണ്ടുവന്നത്. അന്ന് നിയന്ത്രിക്കാനാവാത്ത അവസ്ഥയിലായിരുന്നു. കൂട്ടുകാര്ക്കൊപ്പം ചേര്ന്ന ശേഷമാണ് അവന് ചിമ്പന്സികളുടെ പെരുമാറ്റം പഠിച്ചത്. എന്നാല് അതോടൊപ്പം അവന് മനുഷ്യരോടുള്ള താല്പര്യവും മാറ്റമില്ലാതെ നിലനിന്നു എന്ന് മൃഗശാല അധികൃതര് പറയുന്നു.
Comments