ടോക്കിയോ: പാരാലിമ്പിക്‌സിൽ ഇന്ത്യൻ താരങ്ങൾക്ക് ജയവും തോൽവിയും. വനിതാ താരങ്ങളുടെ പോരാട്ടത്തിൽ ഭാവിനാ പട്ടേൽ ജയിച്ചപ്പോൾ സോനാൽ പട്ടേൽ തോൽവി വഴങ്ങി.
ബ്രിട്ടന്റെ മേഗൻ ഷാക്കെൽട്ടണിനെയാണ് 3-1ന് ഭാവിന തോൽപ്പിച്ചത്. ജയത്തോടെ ഗ്രൂപ്പ് എയിൽ അടുത്ത റൗണ്ടിലേക്ക് കടന്നു. ആദ്യ സെറ്റ് 11-7ന് സ്വന്തമാക്കിയ ഭാവിന 9-11ന് രണ്ടാം സെറ്റ് കൈവിട്ടെങ്കിലും പിന്നീട് 17-15ന് മൂന്നാം സെറ്റും 13-11ന് നാലാം സെറ്റും മത്സരവും സ്വന്തമാക്കി. ആദ്യ മത്സരത്തിൽ ചൈനയുടെ സോവു യിംഗിനോട് 3-0ന് തോറ്റ ഭാവിന രണ്ടാം മത്സരത്തിൽ മികച്ച ഫോമിലായിരുന്നു.
രണ്ടാം മത്സരത്തിൽ വനിതാ താരമായ സോനാൽ പട്ടേൽ ചൈനയുടെ ക്വാൻ ലീയോട് 3-2ന് തോറ്റു. ലോക നാലാം നമ്പറായ ക്വാൻ ലീക്കെതിരെ മികച്ച പോരാട്ടമാണ് സോനാൽ പുറത്തെടുത്തത്. ആദ്യ സെറ്റ് 9-11 നഷ്ടപ്പെട്ടെങ്കിലും രണ്ടാം സെറ്റ് 11-3ന് പിടിച്ച് സോനാൽ ചൈനീസ് താരത്തെ ഞെട്ടിച്ചു. മൂന്നാം സെറ്റിലും മികച്ച പോരാട്ടം പുറത്തെടുത്ത് 15-17 വരെ പിടിച്ചുനിന്നാണ് സെറ്റ് കൈവിട്ടത്. നാലാം സെറ്റ് 11-7ന് നേടി വിജയപ്രതീക്ഷ നിലനിർത്തിയ സോനാലിനെതിരെ തന്റെ ലോകോത്തര മികവ് പുറത്തെടുത്താണ് ക്വാൻ ലീ മത്സരം വരുതിയിലാക്കിയത്.
