മുംബൈ: ഇന്ത്യൻ ടെന്നീസിലെ കരുത്തന്മാരായ ലിയാൻഡർ പയസ്-മഹേഷ്ഭൂപതി സഖ്യത്തിന്റെ കഥപറയുന്ന പരമ്പര ഓൺലൈനിലേക്ക്. വെബ് സീരീസിലാണ് പയ്സ് ഭൂപതി സഖ്യത്തിന്റെ ജീവിതകഥ പ്രക്ഷകരിലേക്ക് എത്തുന്നത്. ബ്രേക് പോയിൻ്റ് എന്നാണ് പരമ്പരയ്ക്ക് പേരിട്ടിരിക്കുന്നത്.
ടെന്നീസ് ലോകത്തിൽ ഇന്ത്യക്കായി നേട്ടങ്ങൾ കൊയ്ത അന്താരാഷ്ട്ര താരങ്ങൾ വെബ്സീരീസിലും തങ്ങളുടെ ടെന്നീസ് കളത്തിലെ പരിശീലനങ്ങളും തന്ത്രങ്ങളും പയറ്റും. കളത്തിനകത്തും പുറത്തുമുള്ള സമ്മർദ്ദങ്ങളും വിജയാരവങ്ങളും ഏറ്റുവാങ്ങിയ മുഹൂർത്തങ്ങൾ പ്രക്ഷകരിലേക്ക് എത്തിക്കാനാകുമെന്നാണ് സീ ചാനൽ അവകാശപ്പെടുന്നത്.
അശ്വനി അയ്യർ തിവാരിയും നിതേഷ് തിവാരിയും സംവിധാനം ചെയ്യുന്ന പരമ്പര 7 ഭാഗങ്ങളായിട്ടാണ് ഓൺലൈനിൽ കാണാനാവുക. തങ്ങളുടെ ടെന്നീസ് കോർട്ടിലെ ഓരോ കാൽവെയ്പ്പുകളും സ്മാഷുകളും നിശ്വാസങ്ങളും ആവേശവും നിരാശയും ബ്രേക് പോയിന്റിലൂടെ ഏവരിലേക്കും എത്തുമെന്ന് ഉറപ്പുണ്ട്. ആരാധകർക്ക് ഇതാദ്യമായിട്ടാണ് ഓൺ ലൈനിലൂടെ തങ്ങളുടെ ജീവിതം കാണാൻ അവസരം ഒരുങ്ങുന്നത്. ഭൂപതിയും താനും രാജ്യത്തിനായി ശരിക്കും വിയർപ്പൊഴുക്കിയെന്നും ഇന്ന് ആരാധകർക്ക് മുന്നിലേക്ക് തങ്ങളുടെ പോരാട്ടമെന്തായിരുന്നുവെന്ന് പ്രദർശിപ്പിക്കാൻ ലഭിക്കുന്ന അവസരമാണിതെന്നും പയസ് പറഞ്ഞു.
താൻ പൊതുവേ കളിക്കളത്തിന് പുറത്ത് ഉൾവലിയുന്ന പ്രകൃതക്കാരനാണ് എന്നത് സത്യമാണ്. എന്നാൽ ഈ പരമ്പരയിലൂടെ തന്റെ ജീവിതത്തിലെ സുപ്രധാന സംഭവങ്ങളാണ് അവതരിപ്പിക്കുന്നത്. ജീവിതയാഥാർത്ഥ്യങ്ങൾ ഏറ്റവും സത്യസന്ധമായി അവതരിപ്പിക്കാൻ ശ്രമിക്കുമെന്നും മഹേഷ് ഭൂപതി പറഞ്ഞു. പരമ്പരയിൽ ടെന്നീസിലെ സീനിയർ താരങ്ങളുമൊത്തുള്ള അനുഭവങ്ങളും പങ്കുവെയ്ക്കാൻ ശ്രമിക്കും. തങ്ങളുടെ ടെന്നീസ് ജീവിതത്തിൽ സന്തോഷവും ആവേശവും ദു:ഖവും നിരാശയുമെല്ലാം ഉണ്ടായിരുന്നു. വിയർപ്പിനൊപ്പം കണ്ണീരും ഉലിച്ചിറങ്ങിയിരുന്നുവെന്നും ഭൂപതി പറഞ്ഞു.
