ശ്രീനഗർ: ജമ്മുകശ്മീരിൽ ഭീകരനെ വധിച്ച് സൈന്യം. നുഴഞ്ഞുകയറ്റ ശ്രമത്തിനിടെ പൂഞ്ച് മേഖലയിൽ സൈന്യം നടത്തിയ വെടിവെയ്പിലാണ് ഭീകരൻ കൊല്ലപ്പെട്ടത്. പൂഞ്ചിലെ നിയന്ത്രണ രേഖയിലാണ് ഭീകരരുടെ നുഴഞ്ഞുകയറ്റം ശ്രദ്ധയിൽപെട്ടത്. അതിർത്തിയിൽ അതിരാവിലെയാണ് ഭീകരർ നുഴഞ്ഞുകയറാൻ ശ്രമം നടത്തിയത്.
അതിർത്തി മേഖലയിൽ നിതാന്തജാഗ്രത യിലാണ് സൈന്യം. വിവിധ സൈനിക വിഭാഗങ്ങളുടെ സംയുക്ത നിരീക്ഷണമാണ് ഭീകരരുടെ നീക്കം കണ്ടെത്താൻ സഹായിച്ചതെന്ന് സൈനിക വൃത്തങ്ങൾ അറിയിച്ചു.
വെടിയുതിർത്ത ഭീകരർക്കെതിരെ സൈന്യം നടത്തിയ പ്രത്യാക്രമണത്തിലാണ് ഒരു ഭീകരനെ വധിച്ചത്. ഏ.കെ.47 അടക്കമുള്ള ആയുധങ്ങൾ കണ്ടെത്തിയെന്നും സൈന്യം അറിയിച്ചു.
