ജോഹന്നാസ്ബർഗ്: ദക്ഷിണാഫ്രിക്കൻ ഇതിഹാസ പേയ്സ് ബൗളർ ഡെയ്ൽ സ്റ്റെയ്ൻ ക്രിക്കറ്റിലെ എല്ലാ ഫോർമാറ്റുകളിൽ നിന്നും വിരമിച്ചു. ട്വിറ്ററിലൂടെയാണ് സ്റ്റെയ്ൻ വിരമിക്കൽ പ്രഖ്യാപനം നടത്തിയത്.
‘ഇന്ന് ഞാൻ ഏറ്റവും ഇഷ്ടപ്പെടുന്ന ഗെയിമിൽ നിന്ന് ഔദ്യോഗികമായി വിരമിക്കുന്നു. കയ്പേറിയതും മധുരമുള്ളതുമാണ് ഈ നിമിഷം. കുടുംബം, ടീമംഗങ്ങൾ, പത്രപ്രവർത്തകർ, ആരാധകർ, എല്ലാവരും ഒരുമിച്ചുള്ള യാത്രയാണിത്, എല്ലാവർക്കും നന്ദി,’ എന്ന് അദ്ദേഹം ട്വീറ്റ് ചെയ്തു.
ഏറ്റവും മികച്ച ഫാസ്റ്റ് ബൗളർമാരിൽ ഒരാളായ സ്റ്റെയിൻ 93 ടെസ്റ്റുകളിൽ നിന്ന് 22.95 ശരാശരിയിൽ 439 വിക്കറ്റുകൾ നേടി.
റോയൽ ചലഞ്ചേഴ്സ് ബാംഗ്ലൂരിനു വേണ്ടി 2020ലെ ഐപിഎല്ലിൽ കളിച്ചിരുന്നു. എന്നാൽ അന്ന് അദ്ദേഹത്തിന് മൂന്നു മത്സരങ്ങളിൽ മാത്രമാണ് കളിക്കുവാൻ സാധിച്ചത്. ഒരു ക്രിക്കറ്റ് താരം എന്ന നിലയിൽ 2021 പാകിസ്ഥാൻ സൂപ്പർ ലീഗിലാണ് സ്റ്റെയ്ൻ തന്റെ ക്രിക്കറ്റ് ജീവിതത്തിലെ അവസാന മത്സരത്തിനിറങ്ങിയത്.
2004 ൽ അരങ്ങേറ്റം കുറിച്ച സ്റ്റെയിൻ 125 ഏകദിനങ്ങളിൽ നിന്ന് 196 വിക്കറ്റുകളും 47 ടി20 കളിൽ നിന്നും 64 വിക്കറ്റുകളും നേടിയിട്ടുണ്ട്.
എബി ഡിവില്ലിയേഴ്സ്, ഹാർദിക് പാണ്ഡ്യ എന്നിവർ സ്റ്റെയ്നെ ആശംസിച്ചു.
