ലണ്ടൻ: ഇംഗ്ലണ്ട് ഓൾറൗണ്ടർ മോയീൻ അലിയെ ഇംഗ്ലണ്ടിന്റെ വൈസ് ക്യാപ്റ്റനായി നിയമിച്ചു. ജോസ് ബട്ലറിന് പകരമായി ഇന്ത്യയ്ക്കെതിരായ നാലാം ടെസ്റ്റ് മത്സരത്തിനാണ് മോയീൻ അലിയെ വൈസ് ക്യാപ്റ്റനായി തിരഞ്ഞെടുത്തത്. ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് (ഇസിബി) ആണ് ഇക്കാര്യം അറിയിച്ചത്.
ഭാര്യയുടെ പ്രസവത്തോടനുബന്ധിച്ച് ജോസ് ബട്ലറിന് അവധി നൽകിയതിന് ശേഷമാണ് മോയീനെ നിയമിച്ചത്. 34 കാരനായ മോയീൻ ഇംഗ്ലണ്ടിനായി 63 ടെസ്റ്റുകൾ കളിച്ചിട്ടുണ്ട്, 2879 റൺസുകളാണ് ഇതുവരെ നേടിയത്, കൂടാതെ 193 വിക്കറ്റുകളും മോയീൻ നേടിയിട്ടുണ്ട്.
പരമ്പരയിലെ ആദ്യ രണ്ട് ടെസ്റ്റുകളിൽ ടീമിൽ ഇടം ലഭിക്കാത്ത മോയിൻ അലി മൂന്നാം മത്സരം മുതലാണ് കളിച്ചത്.
പരിക്കുകളിൽ നിന്ന് മോചിതരായ മാർക്ക് വുഡിനെയും, ക്രിസ് വോക്സിനെയും ഈ ടെസ്റ്റ് മത്സരത്തിൽ ഇംഗ്ലണ്ട് തിരികെ കൊണ്ടുവന്നിട്ടുണ്ട്.
