മുംബൈ: ഫ്രഞ്ച് വാഹന നിർമ്മാതാക്കളായ റെനോ, ഇന്ത്യയിൽ തങ്ങളുടെ പത്താം വാർഷികം ആഘോഷിക്കുകയാണ്. ഇതിന്റെ ഭാഗമായി റെനോയുടെ മികച്ച വാഹനങ്ങളിൽ ഒന്നായ ക്വിഡിന്റെ പ്രത്യേക പതിപ്പ് അവതരിപ്പിച്ചു. ഒമ്പത് വേരിയന്റുകളിലായി എത്തുന്ന ഈ ഹാച്ച്ബാക്കിന് ക്വിഡ് മൈ21 എന്നാണ് പേര് നൽകിയിരിക്കുന്നത്. 4.06 ലക്ഷം മുതൽ 5.51 ലക്ഷം വരെയാണ് വാഹനത്തിന്റെ എക്സ്-ഷോറൂം വില.
ഹെഡ്ലൈറ്റിന് സമീപവും സ്കിഡ് പ്ലേറ്റിലും ഓറഞ്ച് നിറത്തിലുള്ള ആക്സെന്റുകൾ നൽകിട്ടുണ്ട്. ഡ്യുവൽ ടോൺ നിറങ്ങളിൽ ഒരുക്കിയിരിക്കുന്ന വാഹനത്തിന്റെ എക്സ്റ്റീരിയറിൽ ബ്ലാക്ക് ഫിനിഷിങ്ങ് അലോയി വീൽ, ഇലക്ട്രിക് അഡ്ജസ്റ്റിങ്ങ് റിയർ വ്യൂ മിറർ, ബ്ലാക്ക് റൂഫ് എന്നീ ഘടകങ്ങൾ ലഭിക്കും. കൂടാതെ, ടച്ച് സ്ക്രീൻ ഇൻഫോടെയ്ൻമെന്റ് സിസ്റ്റം, സ്റ്റൈലിഷ് സ്റ്റിയറിങ്ങ് വീൽ, ഡിജിറ്റൽ ഡിസ്പ്ലേ നൽകിയിട്ടുള്ള ഇൻസ്ട്രുമെന്റ് ക്ലസ്റ്റർ, ഫാബ്രിക് സീറ്റുകൾ എന്നിവ വാഹനത്തിന്റെ അകം ആകർഷകമാക്കുന്നു. യാത്രക്കാരുടെ സുരക്ഷക്കായി രണ്ട് എയർബാഗുകളും നൽകിയിരിക്കുന്നു. ഈ വാഹനം ഇന്ത്യൻ ഹാച്ച്ബാക്കുകളിൽ മാറ്റത്തിന്റെ വഴിതെളിക്കുമെന്നാണ് റെനോ അഭിപ്രായപ്പെടുന്നത്.
രണ്ട് എഞ്ചിൻ ഓപ്ഷനുകളിലാണ് വാഹനം എത്തിയിട്ടുള്ളത്. 54 ബിഎച്ച്പി പവറും 72 എൻഎം ടോർക്കും ഉൽപാദിപ്പിക്കുന്ന 0.8 ലിറ്റർ എഞ്ചിനും, 68 ബിഎച്ച്പി പവറും 91 എൻഎം ടോർക്കും ഉൽപാദിപ്പിക്കുന്ന 1.0 ലിറ്റർ എഞ്ചിനും എന്നിവയാണ് രണ്ട് ഓപ്ഷനുകൾ. 0.8 ലിറ്റർ എഞ്ചിന് മാനുവൽ ട്രാൻസ്മിഷൻ മാത്രമാണുളളത്. അതേസമയം, 1.0 ലിറ്റർ എഞ്ചിന് മോഡലിന് അഞ്ച് സ്പീഡ് മാനുവലും എഎംടിയുമാണ് ട്രാൻസ്മിഷൻ.
പത്താം വാർഷികത്തോടനുബന്ധിച്ച് നിരവധി ഓഫറുകളും റെനോ ഒരുക്കിയിട്ടുണ്ട്. 80,000 രൂപ വരെയുള്ള ആനുകൂല്യങ്ങൾ, സെപ്റ്റംബർ മാസം മുഴുവൻ ലഭിക്കുമെന്നാണ് റെനോ ഇന്ത്യ അറിയിച്ചിരിക്കുന്നത്.
