കാബൂൾ: അഫ്ഗാനിസ്താൻ സർക്കാരിന്റെ ഇ-മെയിൽ അക്കൗണ്ടുകൾ ഗൂഗിൾ നീക്കം ചെയ്‌തേക്കും.അഫ്ഗാനിസ്താൻ സർക്കാരിന്റെ ഔദ്യോഗിക ഇമെയിൽ അക്കൗണ്ടുകൾ നിയന്ത്രിക്കാനായി താലിബാൻ ഒരുങ്ങുവെന്ന് മുൻപ് റിപ്പോർട്ടുകൾ പുറത്ത് വന്നിരുന്നു.
എന്നാൽ നിലനിലുള്ള അക്കൗണ്ടുകൾ കൂടുതൽ സുരക്ഷിതമാക്കാനായുള്ള നടപടികൾ മാത്രമാണ് ഇതെന്നാണ് ഗൂഗിൾ നൽകുന്ന വിശദീകരണം.അക്കൗണ്ടുകൾ പൂർണ്ണമായും ഒഴിവാക്കില്ലെന്നും താൽക്കാലികമായി മരവിപ്പിക്കുക മാത്രമാണ് ചെയ്യുന്നതെന്നും ഗൂഗിൾ കൂട്ടിചേർത്തു.അഫ്ഗാനിസ്താനിലെ സ്ഥിതി വിദഗ്ധരുമായി കൂടിയാലോചിച്ച് വിലയിരുത്തുകയാണ്.തുടർ നടപടികൾക്ക് സമയമെടുക്കുമെന്നും ഗൂഗിൾ അറിയിച്ചു.
എന്നാൽ മുൻ സർക്കാരിന് ഹാനികരമാകുന്ന രീതിയിൽ താലിബാൻ ഈ അക്കൗണ്ടുകൾ ഉപയോഗിച്ചേക്കാമെന്ന് ആശങ്ക ഉയർന്നിരുന്നു. ഇതിനെ തുടർന്ന് സർക്കാരിന്റെ സുപ്രധാന ഡാറ്റകൾ സംരക്ഷിക്കണമെന്ന് ഉദ്യോഗസ്ഥർ അഭ്യർത്ഥിച്ചിരുന്നു. ഇതിന് പിന്നാലെയാണ് ഗൂഗിളിന്റെ പുതിയ തീരുമാനം. വിഷയത്തിൽ താലിബാൻ നേതാക്കളാരും ഇതുവരെ പ്രതികരിച്ചിട്ടില്ല.
