ദുബായ്: ഒടുവിൽ തോൽവികളിൽ നിന്ന് കരകയറി സൺറൈസേഴ്സ് ഹൈദരാബാദ്. രാജസ്ഥാൻ റോയൽസിനെ 7 വിക്കറ്റുകൾക്ക് തകർത്താണ് കെയിൻ വില്യംസും കൂട്ടരും സഞ്ജുവിന്റെ രാജസ്ഥാനെ തോൽപ്പിച്ചത്. ആദ്യം ബാറ്റ് ചെയ്ത രാജസ്ഥാൻ 5 വിക്കറ്റിന് 164 എന്ന ഭേദപ്പെട്ട സ്കോറാണ് നേടിയത്. മറുപടിയായി സൺറൈസേഴ്സ് 3 വിക്കറ്റുകൾ മാത്രം നഷ്ടപ്പെടുത്തി 18.3 ഓവറിൽ 167 റൺസോടെ ജയം പിടിച്ചു.
സീസണിലെ രണ്ടാമത്തെ ജയമാണ് സൺറൈസേഴ്സ് നേടിയത്. തുടർച്ചയായ 5 തോൽവികൾക്ക് ശേഷമാണ്. നായകൻ കെയിൻ വില്യംസ് നേടിയ 41 പന്തിലെ 51 റൺസും പുതിയ സീസണിൽ ടീമിലെത്തിയ ജാസൺ റോയിയുടെ 42 പന്തിലെ 60 റൺസുമാണ് കരുത്തായത്. യുവതാരം അഭിഷേക് ശർമ 16 പന്തിൽ 21 റൺസുമായി ടീമിന്റെ ജയം വേഗത്തിലാക്കി.
അവസാനം വരെ ഉറച്ചു നിന്ന് പോരാടിയ നായകൻ സഞ്ജു വി സാംസൺ നേടിയ57 പന്തിലെ 82 റൺസാണ് ഇന്നിംഗ്സിന് കരുത്തുപകർന്നത്. തുടർച്ചയായ രണ്ടാം മത്സരത്തിലും സഞ്ജു തന്റെ അനായാസ ശൈലിയിൽ ബാറ്റ് വീശുകയായിരുന്നു. ഓപ്പണർ യശസ്വി ജയ്സ്വാൾ 23 പന്തിൽ 36 റൺസു നേടി. ആറാമത്തെ തോൽവി രാജസ്ഥാന്റെ പ്ലേ ഓഫ് സാദ്ധ്യതയ്ക്ക് മങ്ങലേൽപ്പിച്ചിരിക്കുകയാണ്.
