മുംബൈ: ഇന്ത്യയിലെത്തിയ ആദ്യകാല ഇലക്ട്രിക് എസ്യുവികളിൽ ഒന്നാണ് ജാഗ്വാർ ഐ-പേസ്. വാഹനത്തിന്റെ മികച്ച രൂപകൽപ്പനയ്ക്ക് നിരവധി അന്താരാഷ്ട്ര അംഗീകാരങ്ങളും ഇതിനോടകം ലഭിച്ചിട്ടുണ്ട്. ഇപ്പോൾ ഇതാ പുതിയ ജാഗ്വാർ ഐ-പേസ് ബ്ലാക്ക് എഡിഷന്റെ ബുക്കിംഗ് രാജ്യത്ത് ആരംഭിച്ചിരിക്കുകയാണ് ജാഗ്വാർ ഇന്ത്യ.
ഓൾ-ഇലക്ട്രിക് പെർഫോമൻസ് എസ്യുവിയായ ജാഗ്വാർ ഐ-പേസ് ബ്ലാക്കിന് ധാരാളം സവിശേഷതകളുണ്ട്. ബ്ലാക്ക് പാക്കും, പനോരമിക് റൂഫും കൂടാതെ മറ്റ് അധിക ഫീച്ചറുകളുമായാണ് പുതിയ ബ്ലാക്ക് എഡിഷൻ അവതരിപ്പിച്ചിരിക്കുന്നത്.
മാട്രിക്സ് എൽഇഡി ഹെഡ്ലൈറ്റുകൾ, എൽഇഡി ടെയിൽ ലൈറ്റുകൾ, അഡാപ്റ്റീവ് ക്രൂയിസ് കൺട്രോൾ, മോട്ടറൈസ്ഡ് ടെയിൽ ഗേറ്റ്, മെറിഡിയൻ ഓഡിയോ സിസ്റ്റം, 3 ഡി സറൗണ്ട് ക്യാമറ, ലെതർ സ്പോർട്സ് സീറ്റുകൾ, എസി കൺട്രോളുകൾക്കുള്ള ടച്ച്സ്ക്രീൻ ഇന്റർഫേസ് എന്നിവയാണ് ജാഗ്വാർ ഐ-പേസിൽ ഉൾപ്പെടുത്തിയിരിക്കുന്ന ചില സവിശേഷതകൾ.
ഗ്ലോസ് ബ്ലാക്ക് ആക്സന്റുകളും എബോണി ഇന്റീരിയറും സാധാരണ ഐ-പേസിലെ പോലെ നിലനിർത്തിയിരുക്കുന്നു. 19-ഇഞ്ച് ഡയമണ്ട് ഗ്ലോസ് ഡാർക്ക് ഗ്രേ കോൺട്രാസ്റ്റ് വീലുകൾ, ഈ പ്രത്യേക പതിപ്പിനെ വ്യത്യസ്തമാക്കുന്നു.
മണിക്കൂറിൽ 90 കിലോവാട്ട് ഊർജ്ജം നൽകുന്ന ലിഥിയം അയൺ ബാറ്ററി ഐ-പേസിന് ശക്തി നൽകുന്നു. 395 പിഎസ് കരുത്തും 696 എൻഎം ടോർക്കും വാഹനം ഉത്പാദിപ്പിക്കുന്നു. വെറും 4.8 സെക്കൻഡിനുള്ളിൽ 100 കിലോമീറ്റർ വേഗത കൈവരിക്കാൻ ഈ മോഡലിന് സാധിക്കും.
പ്രീമിയം മെറ്റാലിക് പെയിന്റുകളായ അരൂബ, ഫറലോൺ പേൾ ബ്ലാക്ക് എന്നിവ ഉൾപ്പെടെ വൈവിധ്യമാർന്ന നിറങ്ങളിലാണ് ഐ-പേസ് ബ്ലാക്ക് എത്തുന്നത്. 1.05 കോടി രൂപ മുതലാണ് ജാഗ്വാർ ഐ-പേസിന്റെ വില.
