ലണ്ടൻ: ചാമ്പ്യൻസ് ലീഗിൽ ബാഴ്സലോണയ്ക്ക് നാണംകെട്ട തോൽവി. മെസി പോയ ശേഷം താളം വീണ്ടെടുക്കാത്ത ബാഴ്സലോണ എതിരില്ലാത്ത മൂന്ന് ഗോളുകൾക്കാണ് ബെനഫിക്ക യോട് അടിയറ പറഞ്ഞത്.
ബെനഫിക്കയുടെ ഡാർവിൻ നൂനെസിന്റെ ഇരട്ട ഗോളുകളാണ് ബാഴ്സയെ തകർത്തത്. കളിയുടെ തുടക്കത്തിൽ തന്നെ ബാഴ്സയുടെ വല എതിരാളികൾ കുലുക്കി. 3-ാം മിനിറ്റിൽ ഡാർവിൻ ആദ്യ ഗോൾ നേടി. രണ്ടാം പകുതിയിലും ബാഴ്സയ്ക്ക് ബനഫിക്കയുടെ പ്രതിരോധം തകർക്കാനായില്ല. 69-ാം മിനിറ്റിൽ റാഫ സിൽവ ബനഫിക്കയുടെ രണ്ടാം ഗോൾ നേടി. 79-ാം മിനിറ്റിൽ ലഭിച്ച പെനാൽറ്റികൂടി വലയിലെത്തിച്ച് ഡാർവിൻ ടീമിന് മൂന്നാം ഗോളും സമ്മാനിച്ചു. ഇതിനിടെ അവസാന ഘട്ടത്തിൽ പരുക്കൻ കളി പുറത്തെടുത്തതോടെ ബാഴ്സയുടെ എറിക് ഗാർഷ്യക്ക് ചുവപ്പുകാർഡും ലഭിച്ചു.
രണ്ടു കളികളിൽ രണ്ടിലും തോറ്റ സ്പാനിഷ് വമ്പന്മാർ ഗ്രൂപ്പ് ഇയിലെ നാലുപേരിൽ അവസാനക്കാരായി നാണംകെട്ടിരിക്കുകയാണ്. ഗ്രൂപ്പിൽ എല്ലാ രണ്ടു മത്സവും ജയിച്ച ബയേൺ മ്യൂണിച്ചാണ് മുന്നിൽ. ബനഫിക്ക രണ്ടാമതും ഡൈനാമോ കീവ് മൂന്നാം സ്ഥാനത്തുമാണ്.
Comments