ന്യൂയോർക്ക്: അപരിചതരുമായി ദീർഘ നേരം ചർച്ചകൾ നടത്താൻ താൽപര്യപ്പെടുന്നവരാണ് ഭൂരിഭാഗം ആളുകളുമെന്ന് പഠനം.സാധാരണയായി ആളുകൾ അപരിചിതരുമായി സംഭാഷണങ്ങളിൽ ഏർപ്പെടാറുണ്ട്.എന്നാൽ പല കാരണങ്ങളാൽ സംഭാഷണങ്ങൾ പലതും കുറച്ച് സമയം മാത്രമാണ് നീണ്ടു നിൽക്കാറുള്ളത്. അപരിചിതരെ വിശ്വാസത്തിലെടുക്കാനും അടുത്തിടപഴകാനും പലരും മടിക്കാറുണ്ട്.
എന്നാൽ അമേരിക്കയിൽ നടത്തിയ പുതിയ പഠനപ്രകാരം ഭൂരിഭാഗം ആളുകളും അജ്ഞാതരുമായി ദീർഘ നേരം അർത്ഥവത്തായ ചർച്ചകൾ നടത്താൻ ആഗ്രഹിക്കുന്നു. ഇത്തരം ചർച്ചകൾ ആളുകൾ ആസ്വദിക്കുന്നതായും പഠനം കണ്ടെത്തി.1,800 പരം ആളുകളിൽ നടത്തിയ പഠനത്തിലാണ് ഈ കണ്ടെത്തെലുകൾ.
അമേരിക്കയിലെ ചിക്കാഗോ യൂണിവേഴ്സിറ്റിയിലെ ഗവേഷകരാണ് കൗതുകരമായ ഈ പഠനത്തിന് പിന്നിൽ. പഠനത്തിന്റെ ഭാഗമായി അപരിചിതരായ ജോഡികളോട് സാധാരണ കാര്യങ്ങളും ആഴമേറിയ വിഷയങ്ങളും ചർച്ച നടത്താൻ നിർദ്ദേശം നൽകി.പരസ്പരം പരിചയമുള്ളവർക്കും ഗവേഷകർ ഈ നിർദ്ദേശം നൽകി.
തുടർന്ന് ഗവേഷകർ നൽകിയ ചോദ്യാവലി പൂരിപ്പിക്കാനും ആവശ്യപ്പെട്ടു. ചോദ്യാവലിയിൽ രേഖപ്പെടുത്തിയ ഉത്തരങ്ങൾ വിശകലനം ചെയ്താണ് സംഘം പഠനഫലത്തിലേക്കെത്തിയത്.പരിചിതരായ ആളുകൾ പരസ്പരം ദീർഘമായ ചർച്ചകൾ നടത്തുമെന്നായിരുന്നു ഗവേഷകരുടെ അനുമാനം ഇതിന് വിപരീതമായാണ് പഠനത്തിലെ കണ്ടെത്തെലുകൾ. ഇതാണ് ഗവേഷകരെ ഏറെ ആശ്ചര്യപ്പെടുത്തുന്നത്.
