വിവിധതരത്തിലുള്ള പാചക പരീക്ഷണങ്ങളാണ് ഇപ്പോള്‍ സമൂഹ മാദ്ധ്യമങ്ങളില്‍ വൈറലാകുന്നത്. ഐസ് ക്രീം സ്റ്റിക്കുകളില്‍ നിര്‍മ്മിച്ച ഇഡ്ഡലി മുതല്‍ വൈവിധ്യമായ പരീക്ഷണങ്ങള്‍ ഏറെയാണ്. എന്നാല്‍ ഇത്തരം ഫ്യൂഷന്‍ ഭക്ഷണ രീതികളോട് വിമുഖത രേഖപ്പെടുത്തുന്നവരും കുറവല്ല. ഐസ്‌ക്രീം സ്റ്റിക്കുകളിലെ ഇഡ്ഡലി വഴിമാറിയപ്പോള്‍ ഇപ്പോള്‍ ഭക്ഷണ പ്രേമികളുടെ നാവില്‍ കപ്പലോടിക്കും വിധം പുതിയ രുചിഭേദവുമായി എത്തിയിരിക്കുകയാണ് ചോക്ലേറ്റ് സമോസ
ചോക്ലേറ്റിലും സ്‌ട്രോബെറിയിലും മുക്കിയ സമോസയുടെ വീഡിയോ ഭക്ഷണ പ്രേമികള്‍ ഏറ്റെടുത്തു കഴിഞ്ഞു. എന്നാല്‍ ഈ ഫ്യൂഷന്‍ വിഭവത്തിനു വിമര്‍ശനങ്ങളും ഏറുകയാണ്. വ്യവസായിയായ ഹര്‍ഷ് ഗോയങ്കയാണ് ട്വിറ്ററില്‍ ചോക്ലേറ്റിലും സ്‌ട്രോബെറിയിലും മുക്കിയ സമൂസകളുടെ വീഡിയോ പങ്കിട്ടത്.ചോക്ലേറ്റ് കൊണ്ട് പൊതിഞ്ഞ സമോസയ്‌ക്ക് നിരവധി ആരാധകരാണുള്ളത്. സമോസയ്‌ക്കുള്ളിലും ചോക്ലേറ്റ് നിറച്ചിട്ടുണ്ട്.
ഫ്യൂഷന്‍ ഫുഡിന്റെ ഏറ്റവും പുതിയ അവതരണമാണ് ചോക്ലേറ്റ് സമോസ. 18 സെക്കന്‍ഡ് ദൈര്‍ഘ്യമുള്ള വീഡിയോയില്‍ രണ്ട് രുചിയിലുമുള്ള സമോസ കാണിക്കുന്നുണ്ട്. ഒരു ബോക്‌സില്‍ ചോക്ലേറ്റ് സമോസ കാണിക്കുമ്പോള്‍ മറ്റൊരു ബോക്‌സില്‍ ഇളം പിങ്ക് നിറത്തിലുള്ള ‘സ്‌ട്രോബെറി സമോസയാണ് ഉള്ളത്. സമൂസയ്‌ക്കുള്ളില്‍ എന്താണുള്ളതെന്ന് വീഡിയോയില്‍ വിശദീകരിക്കുന്നുണ്ട്. സമോസ മുറിച്ച് അതിന്റെ ഉള്ളിലുള്ളത് എന്താണെന്നും വീഡിയോയില്‍ കാണാം. 25,000ത്തിലധികം ആളുകളാണ് ഈ ഫ്യൂഷന്‍ സമോസയുടെ വീഡിയോ ഇതുവരെ കണ്ടിരിക്കുന്നത്.
