ലണ്ടൻ: ഇംഗ്ലീഷ് ക്ലബ്ബ് ഫുട്ബോളർ മാർക്കസ് റാഷ്ഫോഡിന് മാഞ്ചസ്റ്റർ സർവ്വകലാശാലയുടെ ആദരം. സർവ്വകലാശാല വിവിധ മേഖലയിൽ പ്രശസ്തരായവർക്ക് നൽകുന്ന ഡോക്ടറേറ്റ് ബിരുദമാണ് റാഷ്ഫോഡിന് നൽകിയത്. കഴിഞ്ഞ വർഷം ജൂലൈ മാസം പ്രഖ്യാപിച്ചതാ ണെങ്കിലും കൊറോണ കാരണം ചടങ്ങ് വൈകുകയായിരുന്നു. ഇന്നലെ സർവ്വകലാശാലയിൽ നടന്ന ചടങ്ങിൽവെച്ച് മാർക്കസ് റാഷ്ഫോഡ് ബഹുമതി ഏറ്റുവാങ്ങി.
ഫുട്ബോളിലൂടെ ലോകപ്രശസ്തനായ താരം നിലവിൽ മാഞ്ചസ്റ്റർ യുണൈറ്റഡിന്റെ താരമാണ്. റാഷ്ഫോഡ് നടത്തുന്ന സേവന പ്രവർത്തനങ്ങളേയും മനുഷ്യാവകാശ സംരക്ഷണ പ്രവർത്തനങ്ങളേയും മുൻനിർത്തിയാണ് ഡോക്ടറേറ്റ് നൽകാൻ തീരുമാനം എടുത്തത്. 23 വയസ്സ് മാത്രം പ്രായമുള്ള മാർക്കസാണ് ഇന്നുവരെ സർവ്വകലാശാല ഡോക്ടറേറ്റ് നൽകി ആദരിച്ചവരിലെ ഏറ്റവും പ്രായംകുറഞ്ഞ വ്യക്തി എന്ന പ്രത്യേകതയും സർവ്വകലാശാല ചൂണ്ടിക്കാട്ടി. ഓൾഡ്ട്രഫോഡിലാണ് പരിപാടി നടന്നത്.
