ബീജിങ്: ചൈനയുടെ ‘996’ തൊഴിൽ സംസ്കാരം തൊഴിലാളികളെ മാനസികവും ശാരീരികവുമായി ബാധിക്കുന്നതായി പഠനം. അമേരിക്കയിലെ ഹാർവാഡ് സർവകലാശാല നടത്തിയ പഠനത്തിലാണ് ചൈനയിലെ തൊഴിലാളി ചൂഷണത്തിന്റെ ഭീകരത വ്യക്തമാക്കുന്നത്.
ദിവസം രാവിലെ 9 മുതൽ രാത്രി 9 വരെയും, ആഴ്ചയിൽ ആറ് ദിവസവും പണിയെടുപ്പിക്കുന്ന തൊഴിൽ സംസ്കാരത്തെയാണ് 996 എന്ന ചുരുക്ക പേരിൽ ചൈനയിൽ അറിയപ്പെടുന്നത്. ഈ തൊഴിൽ സംസ്കാരം വലിയ തോതിലുള ചൂഷണത്തിന് തൊഴിലാളികളെ ഇരയാക്കുന്നതായി പഠനറിപ്പാർട്ട് പുറത്തുവിട്ട ഹോങ്കോങ് പോസ്റ്റ് വ്യക്തമാക്കുന്നു.
ചൈനയിലെ വിഷലിപ്തമായ തൊഴിൽ സാഹചര്യം തൊഴിലാളികളുടെ ഉത്പാദനക്ഷമതയെ ബാധിക്കുന്നു. രാജ്യത്തെ പകുതിയിലധികം തൊഴിലാളികളും തൊഴിൽ സാഹചര്യങ്ങളിൽ തൃപ്തരല്ല. ഇത് മൂലം തൊഴിലാളികൾ ജോലിയിൽ കുറച്ച് സമയം ചെലവഴിക്കുകയും അവരുടെ പരിശ്രമങ്ങൾ കുറയ്ക്കുകയും ചെയ്യുന്നതായി പഠനം ചൂണ്ടിക്കാട്ടുന്നു.
തൊഴിലാളികളെ ശിക്ഷിക്കുന്ന 996 സംസ്കാരം രാജ്യത്തിന്റെ തൊഴിൽ നൈതികതയുടെ ഇരുണ്ട വശമാണ് പ്രകടിപ്പിക്കുന്നത്. ചൈനയിൽ വലിയ തോതിൽ തൊഴിലാളികളുടെ ആത്മഹത്യയും മരണവും നടക്കുന്നുണ്ടെങ്കിലും ഔദ്യോഗികമായി റിപ്പാർട്ട് ചെയ്യുന്നില്ലെന്നും ഹോങ്കോങ് പോസ്റ്റ് പറയുന്നു.
ഹോങ്കോങ് പോസ്റ്റ് 2019 തുടക്കത്തിൽ 996.ഐസിയു എന്ന പ്രോജക്ടിന് വേണ്ടി ആക്ടിവിസ്റ്റ് ഗ്രൂപ്പ് സജ്ജമാക്കിയിരുന്നു. ചൈനയിലെ സാങ്കേതിക കമ്പനികളിലും സ്റ്റാർട്ടപ്പുകളിലുമാണ് 996 തൊഴിൽ സംസ്കാരമുളളത്. നിയമപ്രകാരം ഇത് അനുവദനീയമല്ലെങ്കിലും പല സ്ഥാപനങ്ങളും ഔദ്യോഗികമായോ അനൗദ്യോഗികമായോ നടപ്പാക്കുകയാണെന്നും ഹോങ്കോങ് പോസ്റ്റ് റിപ്പോർട്ട് ചെയ്തു.
