ദുബായ്: ഇന്ത്യൻ പ്രീമിയർ ലീഗ് സീസണലിലെ ആദ്യ ഫൈനലിസ്റ്റാരെന്ന് ഇന്ന് അറിയാം. ആദ്യ പ്ലേ ഓഫിൽ ഇന്ന് ഡൽഹി കാപ്പിറ്റൽസ് മൂന്ന് തവണ ചാമ്പ്യന്മാരായിരുന്ന ചെന്നൈ സൂപ്പർ കിംഗ്സിനെ നേരിടും. കഴിഞ്ഞ സീസണിൽ പ്ലേ ഓഫ് പോലും കാണാതെ തകർന്നടിഞ്ഞ ധോണിയും കൂട്ടരും ഇത്തവണ തകർപ്പൻ തിരിച്ചുവരവിലൂടെ ആദ്യം പ്ലേ ഓഫിലെത്തുന്ന ടീമായാണ് മാറിയിരിക്കുന്നത്.
2019 സീസണിൽ പ്ല ഓഫിൽ ഡൽഹി ചെന്നൈയ്ക്കെതിരെ ആറു വിക്കറ്റിന് തോറ്റിരുന്നു. മുംബൈയോട് ചെന്നൈ ഫൈനലിൽ തോൽക്കുകയായിരുന്നു. എന്നാൽ ഇത്തവണ ചെന്നൈയ്ക്ക് സാദ്ധ്യത കൂടുതലാണ്.
പോയിന്റ് പട്ടികയിൽ പക്ഷെ മികച്ച പ്രകടനത്തോടെ മുന്നേറിയത് ഋഷഭ് പന്ത് നയിക്കുന്ന ഡൽഹിയാണ്. 14 മത്സരങ്ങളിലായി 10ലും ജയിച്ച് 20 പോയിന്റുമായിട്ടാണ് ഡൽഹി നിലയുറപ്പിച്ചത്. ചെന്നൈ 9 മത്സരങ്ങൾ ജയിച്ച് 18 പോയിന്റുമായി രണ്ടാം സ്ഥാനത്താണ്. റോയൽ ചലഞ്ചേഴ്സ് ബംഗളൂരു അതേ പോയിന്റുമായി മൂന്നാം സ്ഥാനത്തും കൊൽക്കത്ത 7 ജയങ്ങളോടെ 14 പോയിന്റോടെ നാലാം സ്ഥാനത്തുമാണ്.
ബാറ്റിംഗിൽ ഋതുരാജ് ഗെയ്ക്ക് വാദും ഡ്യൂപ്ലസിയും അമ്പാട്ടി റായിഡുവും മൊയീൻ അലിയുമാണ് ധോണിക്കൊപ്പം ചെന്നൈയുടെ കരുത്ത്. മദ്ധ്യനിരയിൽ റയ്ന ഫോമിലി ല്ലാത്തതാണ് ഒരു ക്ഷീണമുള്ളത്. രവീന്ദ്ര ജഡേജയും ഷാർദ്ദൂൽ ഠാക്കൂറും നിർണ്ണായകമാകും. ഡൽഹിയുടെ കരുത്ത് ഓപ്പണർമാരായ ശിഖർ ധവാൻ- പൃഥ്വി ഷാ ഓപ്പണർ ജോഡികളുടെ സ്ഥിരതയാണ്. ഒപ്പം ശ്രേയസ് അയ്യരും ഋഷഭ്പന്തും ഷിംറോൺ ഹെറ്റ്മെയറും എതിരാളികളുടെ ബൗളിംഗ് നിരയെ തകർക്കെറിയുമെന്ന പ്രതീക്ഷയിലാണ് ആരാധകർ.
ബൗളിംഗിൽ ഡൽഹിക്കായി കെഗീസോ റബാഡ, ആന്ററിച്ച് നോർച്ചേ, ആവേശ് ഖാൻ എന്നിവരാണ് കരുത്തോടെ നിൽക്കുന്നത്. ഹൈസ്സൽവുഡും, ബ്രാവോയും, ഷാർദ്ദൂൽ ഠാക്കൂറും ദീപക് ചാഹറുമാണ് ചെന്നൈ നിരയിൽ ബൗളിംഗ് കരുത്തായുള്ളത്.
Comments