മുംബൈ: കഴിഞ്ഞ ദിവസം പുറത്തിറങ്ങിയ ടാറ്റ പഞ്ച് ഗ്ലോബൽ എൻസിപിയുടെ ക്രാഷ് ടെസ്റ്റിൽ 5-സ്റ്റാർ നേടിയെന്ന റിപ്പോർട്ടുകൾ പുറത്ത്. രാജ്യത്തെ 5-സ്റ്റാർ റേറ്റിംഗ് നേടിയ മിക്ക ചെറു വാഹനങ്ങളും ടാറ്റയുടേതാണ്. ശക്തമായ സുരക്ഷ വാഗ്ദാനം ചെയ്യുന്ന കാറുകളുടെ ശ്രണിയിൽ ഒരു വാഹനം കൂടി ചേർത്തിരിക്കുകയാണ് നിർമ്മാതാക്കൾ.
കുഞ്ഞനും കരുത്തനുമായ പഞ്ച് ക്രാഷ് ടെസ്റ്റിൽ പങ്കെടുത്ത ദൃശ്യങ്ങൾ ലീക്കായതോടെയാണ് ഇക്കാര്യം പുറത്തായത്. ഇതിനു മുൻപ് ഏറ്റവും അധികം സുരക്ഷ പ്രദാനം ചെയ്യുന്ന വാഹനമായി ടാറ്റയുടെ നെക്സണെ അംഗീകരിച്ചിരുന്നു. യാത്രക്കാരുടെ സുരക്ഷയുടെ കാര്യത്തിൽ യാതൊരു വിട്ടുവീഴ്ചയും നിർമ്മാതാക്കൾ ചെയ്യില്ലെന്ന് ടാറ്റ വീണ്ടും തെളിയിച്ചിരിക്കുകയാണ്.
ക്രിയേറ്റീവ്, അഡ്വൻജർ, പ്യുവർ, അകമ്പ്ലിഷ്ഡ് എന്നീ നാല് വെരിയന്റുകളിലാണ് പഞ്ച് പുറത്തിറക്കിയത്. ഇംപാക്ട് 2.0 ഡിസൈൻ ലാംഗ്വേജിൽ ടാറ്റയുടെ ആൽഫ-ആർക്ക് അടിസ്ഥാനമാക്കി നിർമ്മിച്ച ആദ്യ മിനി എസ് യുവിയാണ് പഞ്ച്. ടാറ്റാ ആൾട്രോസിന്റെ അതേ പ്ലാറ്റ്ഫോമിലാണ് പഞ്ചിന്റെ നിർമ്മാണവും പൂർത്തിയാക്കിയിരിക്കുന്നത്. 16-ഇഞ്ച് ടയറുകൾ, 187 മില്ലിമീറ്റർ ഗ്രൗണ്ട് ക്ലിയറൻസ്, 90-ഡിഗ്രി തുറക്കാൻ സാധിക്കുന്ന ഡോറുകൾ, ഡ്യുവൽ എയർ ബാഗുകൾ എന്നിവയും പഞ്ചിന്റെ മാറ്റ്കൂട്ടുന്നു.
1.2 ലിറ്റർ പെട്രോൾ എഞ്ചിനാണ് വാഹനത്തിന് നൽകിയിരിക്കുന്നത്. വാഹനം പുറത്തിറക്കി ആറ് മാസങ്ങൾക്കുള്ളിൽ എസ് യുവിയുടെ എഎംറ്റി ട്രാൻമിഷൻ ഓപ്ഷൻ പുറത്തിറക്കുമെന്നാണ് ടാറ്റാ ഉറപ്പ് നൽകുന്നത്. സിറ്റി, ഇകോ എന്നീ രണ്ട് ഡ്രൈവ് മോഡുകളാണ് പഞ്ചിന് നൽകിയിരിക്കുന്നത്.
ഒക്ടോബർ 20ഓടെ പഞ്ചിന്റെ വിപണി ആരംഭിക്കാനാണ് ടാറ്റ പദ്ധതിയിടുന്നത്. ഇതിന്റെ ഭാഗമായി 21,000 രൂപ നൽകി വാഹനം ബുക്ക് ചെയ്യാനുള്ള സജ്ജീകരണങ്ങൾ നിർമ്മാതാക്കൾ ഒരുക്കിയിട്ടുണ്ട്.
