ദുബായ്: ഇന്ത്യൻ പ്രീമിയർ ലീഗിലെ കളിമികവ് രാജ്യാന്തര ടീമിലേക്ക് പരിഗണിക്കാനുള്ള മാനദണ്ഡമല്ലെന്ന് വെസ്റ്റിൻഡീസ് നായകൻ കീറൺ പൊള്ളാഡ്. കൊൽക്കത്ത നൈറ്റ് റൈഡേഴ്‌സിന് വേണ്ടി നിർണ്ണായക പ്രകടനം നടത്തുന്ന സുനിൽ നരെയ്‌നക്കുറിച്ചാണ് വിൻഡീസ് നായകന്റെ പ്രതികരണം.
കൊൽക്കത്തയെ ഫൈനലിൽ എത്തിക്കുന്നതിലടക്കം മികച്ച ഫോമിൽ നിൽക്കുന്ന സുനിൽ നരയെനിനെ ലോകകപ്പ് ടി20 ടീമിൽ ഉൾപ്പെടുത്തണമെന്ന് ആരാധകർ സമൂഹ മാദ്ധ്യമങ്ങ ളിലൂടെ ആവശ്യപ്പെട്ടിരുന്നു. ആവശ്യം ശക്തമായതോടെയാണ് കീറൺ പൊള്ളാഡ് സുനിലിന്റെ പ്രവേശനം തള്ളി രംഗത്തെത്തിയത്. നിലവിൽ വെസ്റ്റിൻഡീസ് ടി20 ടീം ക്യാപ്റ്റനും മുംബൈ ഇൻഡ്യൻസ് താരവുമാണ് കീറൺ പൊള്ളാഡ്.
‘ഐ.പി.എല്ലിൽ കൊൽക്കത്തയ്‌ക്ക് വേണ്ടി മികച്ച പ്രകടനം നടത്തിയെന്നത് ശരിയാണ്. എന്നാൽ കഴിഞ്ഞ കുറച്ചുനാളുകളായി രാജ്യാന്തര ക്രിക്കറ്റിൽ സുനിൽ നരെയ്ൻ മികച്ച ഫോമിലല്ല. വേണ്ടത്ര ശാരീരിക ക്ഷമതയുമില്ല. ലോകകപ്പിനായുള്ള ടീം തെരഞ്ഞെടുപ്പിൽ താരം ശാരീരിക ക്ഷമതാ പരിശോധനയിൽ പരാജയപ്പെട്ടിരുന്നു. എന്റെ നല്ല സുഹൃത്താണ്. ലോകോത്തര താരമാണ്. എന്നാൽ ലോകകപ്പ് പോലുള്ള ഒരു സുപ്രധാന മത്സരത്തിനുള്ള ക്ഷമത നിലവിൽ സുനിലിന് ഇല്ല.’ പൊള്ളാഡ് വ്യക്തമാക്കി.
