പലപ്പോഴും നമ്മൾ തമാശയായിട്ടും അല്ലാതെയും ചോദിക്കുന്ന ചോദ്യമുണ്ട് ,കോഴിയാണോ മുട്ടയാണോ ആദ്യമുണ്ടായതെന്ന്…പലരും പല പല ഉത്തരങ്ങൾ തേടി.. കോഴിയാണെന്നും കോഴിമുട്ടയാണെന്നും പല ഉത്തരങ്ങളും കിട്ടി. എന്നാൽ ഇപ്പോഴിതാ കോഴി പ്രസവിച്ചെന്ന വാർത്തയാണ് അസമിൽ നിന്നും പുറത്തുവരുന്നത്.
അസമിലെ ഉദൽഗുരി ജില്ലയിലാണ് അപൂർവ്വ സംഭവം ഉണ്ടായിരിക്കുന്നത്. മൂന്ന് മാസമായി മുട്ടയിടാത്ത കോഴിയാണ് നാലാം മാസം പ്രസവിച്ചത്. നാല് കുഞ്ഞുങ്ങൾക്കാണ് കോഴി ജന്മം നൽകിയത്. ദീപക് സഹാരിയ എന്ന കോഴിവളർത്തലുകാരന്റെ ഫാമിലെ കോഴിയാണ് പ്രവസിച്ചത്.
വിവരം അറിഞ്ഞ് കോഴിക്കുഞ്ഞുങ്ങളെ കാണാൻ ദീപക്കിന്റെ വീട്ടിൽ വലിയ തിരക്കാണ്. നാല് കുഞ്ഞുങ്ങളിൽ രണ്ടെണ്ണം ചത്തു പോയി. പ്രവസിച്ച അമ്മക്കോഴി വനരാജ് എന്ന പ്രത്യേക ഇനത്തിൽപ്പെട്ടവയാണെന്നാണ് ഹൈദരാബാദിലെ ഐസിഐആർ ഡയറക്ടറേറ്റ് ഓഫ് പൗൾട്രി റിസർച്ചിന്റെ കണ്ടെത്തൽ. കോഴിയുടെ പ്രത്യുൽപ്പാദന സംവിധാനത്തിനുള്ളിൽ നിന്നും മുട്ട വിരിഞ്ഞതാകാമെന്നാണ് വിലയിരുത്തൽ.
ഒക്ടോബർ 11നാണ് കോഴി പ്രസവിക്കുന്നത്. അപൂർവ്വമായ സംഭവമാണിതെന്നും പലപ്പോഴും സസ്തനികൾക്കും പക്ഷികൾക്കും പൊതുവായ പൂർവ്വികരുണ്ടെന്നും ജനതക ഘടനയിലുണ്ടായ വ്യതിയാനമാകാം ഇതിന് കാരണമെന്നും വിദഗ്ധർ പറയുന്നു. പ്രവസശേഷം ദീപക്കിന്റെ കോഴിക്ക് രക്തസ്രാവമോ മറ്റ് ആരോഗ്യപ്രശ്നങ്ങളോ ഒന്നും തന്നെ ഇതുവരെ ഉണ്ടായില്ല. കോഴി സുഖമായി ഇരിക്കുന്നുവെന്ന് ദീപക് പറഞ്ഞിരുന്നു. അവിശ്വസനീയമായ സംഭവമാണെന്നും ഇങ്ങനെയൊരു സംഭവം ഔദ്യോഗികജീവിതത്തിൽ കണ്ടിട്ടില്ലെന്നും മൃഗ ഡോക്ടറായ ഷംസുൾ അലി പറഞ്ഞു.
സമാനമായ സംഭവം കേരളത്തിലും ഇതിന് മുൻപ് റിപ്പോർട്ട് ചെയ്തിട്ടുണ്ട്. കണ്ണൂര് പിണറായിയിലെ കോഴിയാണ് പ്രസവിച്ചത്. പ്രവസിച്ച ഉടൻ രക്തസ്രാവം ഉണ്ടായതിനെ തുടർന്ന് അന്ന് കോഴി ചത്തിരുന്നു. തള്ളക്കോഴിയുടെ ഉള്ളിൽ ഭ്രൂണം ഉണ്ടായെങ്കിലും തോടിന്റെ കവചം രൂപപ്പെട്ടിട്ടില്ല. ഭ്രൂണം വികസിച്ച് നിശ്ചിത സമയമെത്തിയാൽ സ്വാഭാവികമായും ശരീരം അതിനെ പുറന്തള്ളാൻ ശ്രമിക്കും. ഇതാകാം കാരണമെന്നും വിലയിരുത്തപ്പെടുന്നു.
