ഡൽഹി: ഹൈന്ദവ ഇതിഹാസമായ രാമയണത്തെ അപമാനിച്ച് എംബിബിഎസ് വിദ്യാർത്ഥികൾ. ഡൽഹി എയിംസിലെ എംബിബിഎസ് ഒന്നാംവർഷ വിദ്യാർത്ഥികളാണ് നാടകത്തിലൂടെ രാമായണത്തെ അപമാനിച്ചത്. സംഭവത്തിൽ വിദ്യാർത്ഥികൾക്കെതിരെ ശക്തമായ പ്രതിഷേധം ഉയരുന്നുണ്ട്.
അൺഅക്കാദമി വ്‌ളോഗിനായാണ് വിദ്യാർത്ഥികൾ നാടകം തയ്യാറാക്കിയത്. രാമായണ കഥകളെ പാരഡി രൂപത്തിൽ അവതരിപ്പിച്ചുകൊണ്ടായിരുന്നു ഇവരുടെ നാടകം. ഇതിലുടനീളം രാമയണകഥയെയും കഥാപാത്രങ്ങളെയും വിദ്യാർത്ഥികൾ അവഹേളിക്കുന്നുണ്ട്. പലരംഗങ്ങളെയും ബോളിവുഡ് ഗാനങ്ങളുടെ അകമ്പടിയോടെയാണ് ഇവർ നാടകത്തിൽ അവതരിപ്പിച്ചത്. യഥാർത്ഥ സംഭാഷണത്തിന് പകരം അശ്ലീല സംഭാഷണങ്ങളും ഇവർ ഉൾപ്പെടുത്തിയിട്ടുണ്ട്.
ശ്രീരാമനും ശൂർപ്പണഖയും തമ്മിലുള്ള സംഭാഷണമാണ് മോശമായി ചിത്രീകരിച്ചിരിക്കുന്നത്. കാമം തോന്നുണ്ടെങ്കിൽ തന്റെ അനുജൻ ലക്ഷ്മണനെ സമീപിക്കൂവെന്ന് നാടകത്തിലെ ശ്രീരാമ കഥാപാത്രം അവതരിപ്പിച്ചയാൾ പറയുന്നു. ശൂർപ്പണഖ ലക്ഷ്മണന്റെ അടുത്തു പോകുമ്പോൾ ബോളിവുഡ് ഗാനമാണ് പശ്ചാത്തലമായി കേൾപ്പിക്കുന്നത്. ഇതിന് സമാനമായ രംഗങ്ങൾ നാടകത്തിന്റെ പലഭാഗങ്ങളിലും ഉണ്ട്.
അൺഅക്കാദമിയ്‌ക്കായി വിദ്യാർത്ഥികൾ അവതരിപ്പിച്ച നാടകത്തിന്റെ ദൃശ്യങ്ങൾ ചില വിദ്യാർത്ഥികൾ സമൂഹമാദ്ധ്യമങ്ങളിൽ പങ്കുവെച്ചിരുന്നു. ഇതോടെയാണ് സംഭവം പുറത്തറിയുന്നത്. രാമായണ കഥയെ അപമാനിച്ച വിദ്യാർത്ഥികൾക്കെതിരെ ശക്തമായ നടപടി സ്വീകരിക്കണമെന്ന ആവശ്യവും ആളുകളിൽ നിന്നും ഉയരുന്നുണ്ട്.
