മുംബൈ : ലഹരിമരുന്ന് കേസിൽ ജാമ്യം ലഭിച്ച ആര്യൻ ഖാൻ ഇന്ന് ജയിൽ മോചിതനാകും. രാവിലെ എട്ട് മണിയോടെ നടപടികൾ പൂർത്തിയാക്കി ആര്യൻ ഖാൻ ജയിലിൽ നിന്നും പുറത്തിറങ്ങുമെന്നാണ് റിപ്പോർട്ടുകൾ. ജാമ്യ ഉത്തരവിന്റെ പകർപ്പ് ലഭിക്കാത്തതിനെ തുടർന്ന് ഇന്നലെയും ആര്യന് ജയിലിൽ തുടരേണ്ടിവരുകയായിരുന്നു.
വ്യാഴാഴ്ചയാണ് കേസിൽ ആര്യന് ജാമ്യം ലഭിച്ചത്. തുടർന്ന് ഇന്നലെ 5.30 വരെ ജാമ്യ ഉത്തരവിനായി ജയിൽ അധികൃതർ കാത്തിരുന്നു. എന്നാൽ ഇതിന്റെ പകർപ്പ് ലഭിക്കാതിരുന്നതോടെ ജയിൽ മോചനവുമായി ബന്ധപ്പെട്ട നടപടിക്രമങ്ങൾ പൂർത്തിയാക്കാൻ അധികൃതർക്ക് കഴിഞ്ഞില്ല.
കർശന ഉപാധികളോടെയാണ് ആര്യന് ജാമ്യം അനുവദിച്ചത്. പതിനാലോളം ജാമ്യ വ്യവസ്ഥകളാണ് ഉത്തരവിലുള്ളത്. ജസ്റ്റിസ് നിതിൻ ഡബ്ല്യൂ സാംബ്രെയാണ് ആര്യൻ ഉൾപ്പെടെ മറ്റ് രണ്ട് പേർക്കും ജാമ്യം നൽകിയത്. നേരത്തെ രണ്ട് തവണ വിചാരണ കോടതി ജാമ്യം നിഷേധിച്ചിരുന്നു. നടി ജൂഹി ചൗളയാണ് ആര്യൻ ഖാന് വേണ്ടി ആൾ ജാമ്യം നിന്നത്.
