തിരുവനന്തപുരം: തെക്ക് പടിഞ്ഞാറൻ ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദത്തെ തുടർന്ന് കേരളത്തിൽ വരും ദിവസങ്ങളിൽ കനത്ത മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകി. ഇതിനെ തുടർന്ന് മൂന്ന് ദിവസത്തേയ്ക്ക് സംസ്ഥാനത്തെ വിവിധ ജില്ലകളിൽ ഓറഞ്ച് അലർട്ട് പ്രഖ്യാപിച്ചു. നിലവിൽ ന്യൂനമർദ്ദം ശ്രീലങ്കക്ക് മുകളിലും തമിഴ്നാട് തീരത്തിനും സമീപമായാണ് സ്ഥിതി ചെയ്യുന്നതെന്നും കാലാവസ്ഥ നീക്ഷണ കേന്ദ്രം അറിയിച്ചു.
അടുത്ത 3-4 ദിവസത്തേയ്ക്ക് കൂടി പടിഞ്ഞാറു ദിശയിലുള്ള ന്യൂനമർദ്ദത്തിന്റെ സഞ്ചാരം തുടരും. ഇതിന്റെ സ്വാധീനത്താൽ കേരളത്തിൽ ഇടിമിന്നലോടുകൂടിയ മഴ നവംബർ 3 വരെ തുടരാൻ സാധ്യതയുണ്ട്. നവംബർ 3 വരെ കേരളത്തിലെ ഒറ്റപ്പെട്ട സ്ഥലങ്ങളിൽ ശക്തമായ മഴയ്ക്കും ഒക്ടോബർ 31 മുതൽ നവംബർ 2 വരെ ഒറ്റപ്പെട്ട സ്ഥലങ്ങളിൽ അതി ശക്തമാായ മഴയ്ക്കും സാധ്യതയെന്നാണ് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകിയത്.
അടുത്ത മൂന്ന് ദിവസത്തേയ്ക്ക് തിരുവനന്തപുരം,കൊല്ലം, പത്തനംതിട്ട, കോട്ടയം, ഇടുക്കി എന്നീ ജില്ലകളിൽ ഓറഞ്ച് അലർട്ട് പ്രഖ്യാപിച്ചിടുണ്ട്. ആലപ്പുഴ, പാലക്കാട്, മലപ്പുറം എന്നീ ജില്ലകളിൽ ഇന്ന് യെല്ലോ അലർട്ടാണ് പ്രഖ്യാപിച്ചിരുന്നത്. നവംബർ 2ന് പത്തനംതിട്ട, കോട്ടയം,ഇടുക്കി, പാലക്കാട്, കോഴിക്കോട്, വയനാട് ജില്ലകളിൽ ഓറഞ്ച് അലർട്ടും, മലപ്പുറം, തൃശ്ശൂർ, എറണാകുളം, കൊല്ലം, തിരുവനന്തപുരം ജില്ലകളിൽ യെല്ലോ അലർട്ടുമായിരിക്കും.
