കോട്ടയം: ഉരുൾപൊട്ടി കനത്ത നാശ നഷ്ടങ്ങളുണ്ടായ കൂട്ടിക്കൽ മേഖലയിൽ സേവന പ്രവർത്തനങ്ങൾ നടത്തുന്ന സേവാഭാരതിയ്ക്ക് കൈത്താങ്ങായി പിന്നണി ഗായകൻ ജി വേണുഗോപാലും. പ്രകൃതി ക്ഷോഭത്തിൽ എല്ലാം നഷ്പ്പെട്ടവർക്ക് വിതരണം ചെയ്യുന്നതിനായി വീട്ടുപകരണങ്ങളാണ് സേവാഭാരതിയ്ക്ക് കേരളത്തിന്റെ പ്രിയ ഗായകൻ കൈമാറിയത്. വേണുഗോപാൽ നേതൃത്വം നൽകുന്ന സസ്നേഹം ജി വേണുഗോപാൽ ഫൗണ്ടേഷനാണ് നിരാലംബരുടെ കണ്ണീരൊപ്പാൻ സേവാഭാരതിയ്ക്കൊപ്പം കൈകോർത്തത്.
ഫൗണ്ടേഷൻ ഭാരവാഹികൾ ദുരന്തം നടന്ന പ്രദേശങ്ങളും ദുരിതാശ്വാസ ക്യാംമ്പുകളും സന്ദർശിച്ചു. സേവാഭാരതിയ്ക്ക് സഹായങ്ങൾ കൈമാറിയതിന്റേയും കൂട്ടിക്കൽ പ്രദേശത്തിന്റെയും ദൃശ്യങ്ങൾ ജി. വേണുഗോപാൽ തന്റെ ഫേസ് ബുക്ക് പേജിലും പോസ്റ്റ് ചെയ്തിട്ടുണ്ട്. നിരവധി പേർ മലയാളത്തിന്റെ ഭാവ ഗായകനെ അഭിനന്ദിച്ചുകൊണ്ട് പോസ്റ്റിനു താഴെ കമന്റുകളുമായെത്തുന്നുണ്ട്.
പ്രകൃതി സംഹാര താണ്ഡവമാടിയ കൂട്ടിക്കൽ പ്രദേശത്ത് പുനരധിവാസ പ്രവർത്തനങ്ങളാണിപ്പോൾ നടക്കുന്നത്. പ്രദേശത്തിന്റെ വീണ്ടെടുപ്പിനായി ബൃഹത് പദ്ധതികളാണ് പ്രദേശത്ത് സേവാഭാരതി ആവിഷ്കരിച്ച് നടപ്പിലാക്കാനുദ്ദേശിക്കുന്നത്. സേവാഭാരതിയുടെ സേവനപ്രവർത്തനങ്ങൽ നേരിട്ട് മനസിലാക്കിയ ശേഷമാണ് ഫൗണ്ടേഷൻ ഭാരവാഹികൾ മടങ്ങിയത്.
