കൊച്ചി: ബിഗ് ബഡ്ജറ്റ് മോഹൻലാൽ ചിത്രം മരക്കാർ അറബിക്കടലിന്റെ സിംഹം തീയേറ്ററിലും റിലീസ് ചെയ്‌തേക്കുമെന്ന് റിപ്പോർട്ട്. വിഷയത്തിൽ ആമസോൺ പ്രൈമുമായി നിർമ്മാതാവ് ആന്റണി പെരുമ്പാവൂർ ചർച്ച നടത്തിയതായാണ് വിവരം. ആമസോൺ അനുമതി നൽകിയാൽ ചിത്രം തീയേറ്ററിൽ പ്രദർശിപ്പിക്കും.
ആന്റണി പെരുമ്പാവൂരിന്റെ ഉടമസ്ഥതയിലുള്ള നാൽപ്പതോളം തീയേറ്ററുകളിലും നടൻ ദിലീപിന്റെ ഉടമസ്ഥതയിലുള്ള തീയേറ്ററുകളിലും ചില ഉടമകളുടെ തീയേറ്ററുകളിലും സിനിമ പ്രദർശിപ്പിച്ചേക്കുമെന്നാണ് സൂചന. ഇതിനായുള്ള ചർച്ചകൾ പുരോഗമിക്കുകയാണ്. ആന്റണി പെരുമ്പാവൂരിന്റെ നീക്കത്തിന് വിതരണക്കാരുടേയും നിർമ്മാതാക്കളുടേയും പൂർണ്ണ പിന്തുണയുണ്ട്.
പത്ത് ദിവസം സിനിമ ഇത്തരത്തിൽ തീയേറ്ററുകളിൽ പ്രദർശിപ്പിക്കാനാണ് തീരുമാനം. ആരാധകരുടെ ആവശ്യം പരിഗണിച്ചാണ് ആന്റണി പെരുമ്പാവൂരിന്റെ നീക്കം. എന്നാൽ ആന്റണി പെരുമ്പാവൂരിന്റെ നീക്കത്തിനെതിരെ തീയേറ്റർ ഉടമകളുടെ സംഘടന എത്തിയിട്ടുണ്ട്. ഒടിടിയിൽ റിലീസ് ചെയ്യുന്ന സിനിമ തീയേറ്ററിൽ റിലീസ് ചെയ്യാൻ അനുവദിക്കില്ലെന്നാണ് സംഘടനയുടെ നിലപാട്.
