മുംബൈ: ഏതാനും ആഴ്ചകൾക്ക് മുൻപാണ് വെർസിസ് 1000 നവീകരിച്ച പതിപ്പിനെ നിർമാതാക്കളായ കവസാക്കി ആഗോളവിപണിയിൽ അവതരിപ്പിച്ചത്. എൻട്രി-ലെവൽ ‘സ്റ്റാൻഡേർഡ്’ വേരിയന്റ് നവീകരിച്ച് 2022 മോഡൽ പതിപ്പിനെ ഇന്ത്യൻ വിപണിയിലും എത്തിക്കുകയാണ് കമ്പനി. ഇരുചക്ര വാഹന യാത്ര ഇഷ്ടപ്പെടുന്ന സാഹസിക സഞ്ചാരികൾക്ക് ഉറ്റതോഴനാകും വാഹനമെന്നാണ് കമ്പനി അവകാശപ്പെടുന്നത്.
കാൻഡി ലൈം ഗ്രീൻ കളർ ഓപ്ഷനിൽ ലഭ്യമാകുന്ന സ്പോർട്സ് ടൂററിന്റെ ഏറ്റവും പുതിയ മോഡലിന് 11.55 ലക്ഷം രൂപയാണ് എക്സ്ഷോറൂം വില. ബുക്കിംഗ് ആരംഭിച്ചിട്ടുണ്ടെന്നും കവസാക്കി വ്യക്തമാക്കി. ഏറ്റവും പുതിയ മലിനീകരണ മാനദണ്ഡങ്ങൾ ഉൾപ്പെടെ
പാലിച്ചുകൊണ്ടാണ് ബൈക്ക് എത്തുന്നത്.
ബിഎസ്6 നിലവാരത്തിലുള്ള 1,043 സിസി, ഇൻലൈൻ-ഫോർ, ലിക്വിഡ്-കൂൾഡ് എഞ്ചിനാണ് കരുത്ത് നൽകുന്നത്. എഞ്ചിൻ 9,000 ആർപിഎമ്മിൽ 118 ബിഎച്ച്പി പവറും 102 എൻഎം ടോർക്കും ഉത്പാദിപ്പിക്കുന്നു. ആറ് സ്പീഡ് ഗിയറുകളും ബൈക്കിനെ കൂടുതൽ പ്രിയങ്കരമാക്കും. ക്രൂയിസ് കൺട്രോൾ, കവസാക്കി കോർണറിംഗ് മാനേജ്മെന്റ് ഫംഗ്ഷനുകൾ, ട്രാക്ഷൻ കൺട്രോൾ സിസ്റ്റം, എബിഎസ് എന്നിവ ഈ ക്ലാസ് സ്പോർട്സ് ടൂററിലെ ഇലക്ട്രോണിക് റൈഡർ എയ്ഡുകളിൽ ഉൾപ്പെടുകയും ചെയ്തിട്ടുണ്ട്.
അലൂമിനിയം ട്വിൻ-ട്യൂബ് ഫ്രെയിമിലാണ് മോഡൽ നിർമ്മിച്ചിരിക്കുന്നത്. പുതിയ പതിപ്പിന് എൽഇഡി ഹെഡ്ലാമ്പുകൾ, സെമി-ഡിജിറ്റൽ ഇൻസ്ട്രുമെന്റ് ക്ലസ്റ്റർ, പവർ സോക്കറ്റ്, കൂടാതെ ധാരാളം ഇലക്ട്രോണിക് സവിശേഷതകളും ഉപഭോക്താക്കൾക്കായി ഒരുക്കിയിരിക്കുന്നു. 255 കിലോഗ്രാം ഭാരമുള്ള അഡ്വഞ്ചർ ടൂററിന് 21 ലിറ്റർ ഫ്യുവൽ ടാങ്കും 17 ഇഞ്ച് വീലുകളുമുണ്ട്.
