മുംബൈ: ഒരു കാലത്ത് കുട്ടികളുടെയും യുവാക്കളുടെയും സ്വപ്നമായിരുന്നു സ്വന്തമായി ഒരു 220. ആരെയും ആകർഷിക്കുന്ന ഭംഗിയും മികച്ച പ്രവർത്തനക്ഷമതയും കരുത്തും എല്ലാം നൽകി പൾസറിന്റെ എക്കാലത്തെയും മികച്ച ബൈക്കായി കരുതിയിരുന്നു ഈ വീരനെ. എന്നാൽ പുതിയ റിപ്പോർട്ടുകൾ പ്രകാരം ഈ മോട്ടോർസൈക്കിളിന്റെ നിർമ്മാണം അവസാനിപ്പിക്കുകയാണ് ബജാജ്.
പഴയ തലമുറ പുതിയ തലമുറയിലെ യുവാക്കൾക്ക് വഴി മാറിക്കൊടുക്കുന്നത് പോലെ പൾസറിന്റെ N250യും ബജാജ് F250 എല്ലാം നിരത്ത് കീഴടക്കാൻ ഒരുങ്ങുമ്പോൾ വഴി മാറി നൽകുകയാണ് 220F എന്ന ഇതിഹാസം. ചിലർ ഇത് വെറുമൊരു അഭ്യൂഹമായാണ് കണക്കായിത്. എന്നാൽ അവസാന ബാച്ച് ബൈക്കുകളുടെ വിൽപ്പന കൂടി തീർന്നാൽ വിപണിയിൽ നിന്നും വിട പറയും ഈ മോഡൽ.
2007ലാണ് പൾസർ 220F പുറത്തിറങ്ങിയത്. കരുത്തും, രൂപഭംഗിയും കൊണ്ട് യുവാക്കൾക്കിടയിൽ വൻ ജനപ്രീതി തന്നെ ബൈക്ക് നേടിയിരുന്നു. 220 സിസി, സിംഗിൾ സിലിണ്ടർ ഓയിൽകൂൾഡ് എഞ്ചിൻ ആണ് ബൈക്കിന് കരുത്ത് പകരുന്നത്. ഇത് 8500 ആർപിഎമ്മിൽ 20.4 ബിഎച്ച്പി പവർ ഔട്ട്പുട്ടും 7000 ആർപിഎമ്മിൽ 18.55 എൻഎം പീക്ക് ടോർക്കും ഉൽപ്പാദിപ്പിച്ചിരുന്നു.
പൾസർ 220F യൂണിറ്റുകളുടെ അവസാന ബാച്ച് പുറത്തായതിനാൽ, ഡീലർഷിപ്പുകളിൽ സ്റ്റോക്കുകൾ അവസാനിക്കുന്നതോടെ ഈ ബൈക്കുകൾ പുറത്തിറങ്ങില്ലെന്നാണ് അഭ്യൂഹങ്ങൾ. നിലവിൽ, 1,33,907 രൂപയായിരുന്നു പൾസർ 220F ന്റെ എക്സ്ഷോറൂം വില.
220Fനെക്കാൾ കരുത്തുള്ള പതിപ്പ് പൾസർ അവതരിപ്പിച്ചതോടെ ഈ ഐതിഹാസിക മോഡലിന്റെ യുഗം അവസാനിക്കുകയാണ്. നിലവിലുള്ള ബൈക്കുകളും ഡീലർഷിപ്പിലുള്ള ഏതാനും യൂണിറ്റുകളുടെയും വിൽപ്പന കഴിയുന്നതോടെ ഇനി 220F വിപണിയിൽ ലഭിച്ചേക്കില്ല.
