ന്യൂഡൽഹി : ഒരു കാലത്ത് ടെലിവിഷൻ ചാനലുകളിൽ സജീവമായിരുന്ന വ്യക്തിയായിരുന്നു കേന്ദ്ര മന്ത്രി സ്മൃതി ഇറാനി. സിരീയലുകളിലും ടെലിവിഷൻ ഷോകളിലും നിറഞ്ഞു നിന്നിരുന്ന അവരെ ഇരുകൈകളോടെയാണ് പ്രേക്ഷകർ ഏറ്റെടുത്തത്. ഇന്നും സ്മൃതി ഇറാനിയുടെ ഒട്ടേറെ കഥാപാത്രങ്ങൾ പ്രേക്ഷക മനസിൽ നിന്നും മായാതെ നിൽക്കുന്നുണ്ട്. പിന്നീട് 2014 ൽ കേന്ദ്ര മന്ത്രിയായി സത്യപ്രതിജ്ഞ ചെയ്തതോടെയാണ് സ്മൃതി ഇറാനി വീണ്ടും മുഖ്യധാരയിലേക്ക് വരുന്നത്. അഭിനയിക്കാൻ മാത്രമല്ല രാജ്യത്തിന് വേണ്ടി ഉത്തരവാദിത്വപ്പെട്ട ജോലി ഏറ്റെടുത്ത് പ്രവർത്തിക്കാനും സാധിക്കുമെന്ന് ചുരുങ്ങിയ കാലം കൊണ്ട് അവർ തെളിയിച്ചു.
സാഹിത്യ ലോകത്തും മുദ്ര പതിപ്പാക്കാനൊരുങ്ങിയ സ്മൃതി ഇറാനിയുടെ വാർത്തകളും നവമാദ്ധ്യമങ്ങളിൽ ചർച്ചയായിരുന്നു. ലാൽസലാം എന്ന പേരിലാകും മന്ത്രിയുടെ ആദ്യ നോവൽ ഉടൻ പുറത്തിറങ്ങുക. 2010ൽ ഛത്തീസ്ഗഡിലെ ദന്തേവാഡയിൽ 76 സി.ആർ.പി.എഫ് ജവാൻമാരുടെ മരണത്തിന് കാരണമായ സംഭവമാണ് നോവലിന്റെ പ്രമേയം. വെസ്റ്റ്ലാൻഡ് പബ്ലിക്കേഷൻസ് ആണ് പുസ്തകം പുറത്തിറക്കുന്നത്.
എന്നാൽ ഇപ്പോൾ ശരീരഭാഷയിൽ മാറ്റം വരുത്തിക്കൊണ്ട് ആളുകളെ വീണ്ടും ഞെട്ടിച്ചിരിക്കുകയാണ് സ്മൃതി ഇറാനി. കേന്ദ്ര മന്ത്രി അടുത്തിടെ പങ്കുവെച്ച ചിത്രം ഇതിനോടകം തന്നെ സമൂഹമാദ്ധ്യമങ്ങളിൽ വൈറലായിരിക്കുകയാണ്. ഒരു മരത്തിൽ പൂക്കൾ പിടിച്ചുകൊണ്ട് നിൽക്കുന്ന ചിത്രമാണിത്. ശരീരഭാരം വളരെയധികം കുറഞ്ഞതായി ചിത്രത്തിൽ കാണാം. ചിത്രത്തിന് പ്രതികരണങ്ങളുമായി നിരവധി പേരാണ് രംഗത്തെത്തിയിരിക്കുന്നത്.
ഇത്തരത്തിൽ എല്ലാ മേഖലകളിലും തന്റെ കഴിവ് തെളിയിക്കുന്ന കേന്ദ്ര മന്ത്രി സ്ത്രീ സമൂഹത്തിന് ഒരു വലിയ പ്രചോദനമായിരിക്കുകയാണ്. സ്ത്രീ ശാക്തീകരണവും ഇന്ത്യയുടെ നവോത്ഥാനവും സ്വപ്‌നം കണ്ട് പ്രവർത്തിക്കുന്ന കേന്ദ്ര മന്ത്രിയെന്ന് ഒരിക്കൽ കൂടി തെളിയിക്കുകയാണ് സ്മൃതി ഇറാനി.
