ഭുവനേശ്വർ : പാവങ്ങൾക്ക് റേഷൻ കടകൾ വഴി ഭക്ഷ്യധാന്യങ്ങൾ വിതരണം ചെയ്യുന്ന ഗരീബ് കല്യാൺ അന്ന യോജനയുടെ കാലാവധി നീട്ടണമെന്ന് ആവശ്യപ്പെട്ട് ഒഡീഷ മുഖ്യമന്ത്രി നവീൻ പട്നായിക്. ഇക്കാര്യം ആവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് അദ്ദേഹം കത്ത് നൽകി. പദ്ധതിയുടെ കാലാവധി എട്ട് മാസത്തേക്ക് കൂടി നീട്ടണമെന്നാണ് കത്തിലെ ആവശ്യം.
കൊറോണയുണ്ടാക്കിയ ആഘാതത്തിൽ നിന്നും സംസ്ഥാനം ഇതുവരെ കരകയറിയിട്ടില്ല. അതിനാൽ ഗരീബ് കല്യാൺ അന്ന യോജനയുടെ ഭാഗമായി ഭക്ഷ്യവസ്തുക്കൾ വിതരണം ചെയ്യുന്നത് തുടരണം. അടുത്ത എട്ട് മാസത്തേക്ക് കൂടി പദ്ധതി നീട്ടണമെന്നും അദ്ദേഹം കത്തിൽ ആവശ്യപ്പെട്ടു.
പാവങ്ങൾക്ക് ഗുണം ചെയ്യുന്ന പദ്ധതി ആവിഷ്കരിച്ച പ്രധാനമന്ത്രിയ്ക്ക് അദ്ദേഹം നന്ദി പറഞ്ഞു. കഴിഞ്ഞ ഏഴ് മാസമായി പദ്ധതിയ്ക്ക് കീഴിൽ സൗജന്യമായി അരിയും ഭക്ഷ്യധാന്യങ്ങളും നൽകിവരുന്നു. കൊറോണയിൽ ദുരിതം അനുഭവിക്കുന്ന ജനങ്ങൾക്ക് ഇത് വലിയ ആശ്വസമായിരുന്നു. കൊറോണക്കാലത്ത് സംസ്ഥാനത്തെ ആരും പട്ടിണികിടക്കേണ്ട സാഹചര്യം ഉണ്ടായിട്ടില്ല. ഇതിന് കേന്ദ്രസർക്കാരിനോട് നന്ദി പറയുന്നുവെന്നും നവീൻ പട്നായികിന്റെ കത്തിൽ പറഞ്ഞു.
ഒഡീഷയിൽ മെയ് മാസത്തിൽ ആരംഭിച്ച പദ്ധതിയുടെ കാലാവധി ഈ മാസം അഞ്ചിന് അവസാനിച്ചിരുന്നു. ഈ സാഹചര്യത്തിലാണ് കാലാവധി വീണ്ടും നീട്ടണമെന്ന ആവശ്യപ്പെട്ട് നവീൻ പട്നായിക് പ്രധാനമന്ത്രിയ്ക്ക് കത്ത് നൽകിയത്.
