ബ്രസൽസ്: കൊറോണ പ്രതിരോധ കുത്തിവെയ്പ്പിന് ഒമ്പത് മാസം കാലാവധി നിശ്ചയിക്കാൻ ആലോചനയുമായി യൂറോപ്യൻ യൂണിയൻ. വാക്സിനെടുത്ത് 9 മാസം പിന്നിട്ടവർ ബൂസ്റ്റർ ഡോസ് സ്വീകരിക്കണമെന്ന നിർദേശമാണ് മുന്നോട്ടുവെയ്ക്കുന്നത്. യൂറോപ്യൻ യൂണിയന് കീഴിലുള്ള വിവിധ രാജ്യങ്ങളിൽ വീണ്ടും കൊറോണ വൈറസ് വ്യാപകമാകുന്നതിന്റെ പശ്ചാത്തലത്തിൽ കൂടിയാണിത്.
ലോകാരോഗ്യ സംഘടന അംഗീകരിച്ചിട്ടുള്ള വാക്സിൻ സ്വീകരിച്ചവർക്ക് യൂറോപ്യൻ യൂണിയന് കീഴിലുള്ള എല്ലാ രാജ്യങ്ങളും ജനുവരി 10 മുതൽ തുറന്നുകൊടുക്കാനാണ് ആലോചന. ഇതിന് ശുപാർശകളും നൽകി കഴിഞ്ഞു. കൂടുതൽ അന്താരാഷ്ട്ര യാത്രക്കാരെ സ്വീകരിക്കുന്നതിന്റെ പശ്ചാത്തലത്തിലാണ് നിബന്ധനകൾ കർശനമാക്കുന്നത്.
ഇത്തരത്തിൽ ബൂസ്റ്റർ ഡോസ് സ്വീകരിക്കാത്തവർ ആണെങ്കിൽ രാജ്യത്ത് പ്രവേശിക്കുമ്പോൾ ക്വാറന്റൈൻ നിയമങ്ങൾ പാലിക്കാൻ സന്നദ്ധരാകണമെന്നും യൂറോപ്യൻ യൂണിയൻ ആവശ്യപ്പെടുന്നു. വാക്സിൻ കാലാവധിക്കുള്ളിലുള്ളവർക്ക് വിസയ്ക്ക് ഉൾപ്പടെ മുൻഗണന ലഭിക്കും. ഇതിനിടെ കഴിഞ്ഞ ദിവസം കുട്ടികൾക്ക് വാക്സിനെടുക്കാൻ യൂറോപ്യൻ യൂണിയന്റെ ഡ്രഗ് റെഗുലേറ്റർ അനുമതി നൽകിയിരുന്നു. ഫൈസറിന്റെ കോമിർനേറ്റി എന്ന് പേരിട്ട വാക്സിനാണ് 5നും 11നും ഇടയിൽ പ്രായമുള്ള കുട്ടികൾക്ക് എടുക്കാൻ അനുമതി ലഭിച്ചിരിക്കുന്നത്.
