കൊച്ചി: ആരാധകർ ഏറെ ആവേശത്തോടെ കാത്തിരുന്ന മരക്കാർ അറബിക്കടലിന്റെ സിംഹം കാണാൻ തീയേറ്ററിൽ നേരിട്ടെത്തി മോഹൻലാൽ. സരിത തീയേറ്ററിൽ ഭാര്യ സുചിത്രയ്ക്കൊപ്പമാണ് അദ്ദേഹം സിനിമയുടെ ആദ്യ ഷോയ്ക്കെത്തിയത്. ഏറെ പ്രത്യേകതകളുള്ള സിനിമ ആയതുകൊണ്ടാണ് സിനിമ കാണാൻ നേരിട്ട് തീയേറ്ററിൽ എത്തിയതെന്ന് മോഹൻലാൽ പറഞ്ഞു. ‘ ഈ സിനിമ തീയേറ്ററിൽ കാണാൻ ആഗ്രഹിച്ച ആളാണ് താൻ. അതുകൊണ്ടാണ് തീയേറ്ററിൽ വന്ന് കണ്ടത്. ധാരാളം പ്രത്യേകതകളുള്ള സിനിമയാണിത്. ആവേശത്തിൽ തന്നെയാണ് സിനിമ കണ്ടു കൊണ്ടിരിക്കുന്നത്. തീയേറ്ററിൽ കാണേണ്ട സിനിമ തന്നെയാണ്. ഇങ്ങനെയാരു സദസ്സിൽ ഏറ്റവും കൂടുതൽ ദിവസം സിനിമ പ്രദർശിപ്പിക്കാൻ സാധിക്കണം എന്നാണ് ആഗ്രഹിക്കുന്നതെന്നും’ മോഹൻലാൽ പറഞ്ഞു.
ചിത്രത്തിന്റെ നിർമ്മാതാവ് ആന്റണി പെരുമ്പാവൂർ, നടന്മാരായ സിദ്ദിഖ്, ഉണ്ണി മുകുന്ദൻ, സന്തോഷ് കീഴാറ്റൂർ തുടങ്ങിയവരും മരക്കാറിന്റെ ആദ്യ ഷോ കാണാൻ ഇവിടെ എത്തിയിരുന്നു. രാത്രി 12 മണിയോടെ തന്നെ എല്ലാ തീയേറ്ററുകളിലും ആദ്യ ഷോ ആരംഭിച്ചിരുന്നു. റിലീസിന് മുൻപ് തന്നെ 100 കോടി ക്ലബ്ബിൽ കേറിയെന്ന ചരിത്രം കുറിച്ചാണ് ചിത്രം തീയേറ്ററുകളിലേക്ക് എത്തുന്നത്. പ്രീബുക്കിംഗ് കളക്ഷനിൽ നിന്നാണ് ഈ നേട്ടം സ്വന്തമാക്കിയത്. ലോകമെമ്പാടുമുള്ള 4100 സ്ക്രീനുകളിലാണ് മരക്കാർ പ്രദർശിപ്പിക്കുന്നത്. ദിവസേന 16,000 ഷോകളാണ് ഈ ചിത്രത്തിന് ഉണ്ടാവുക. അഞ്ച് ഭാഷകളിലാണ് ചിത്രം റിലീസ് ചെയ്യുന്നത്.
മലയാളത്തിൽ ഒരു സിനിമക്ക് കിട്ടുന്ന ഏറ്റവും കൂടുതൽ റിലീസിങ് സെന്ററുകളാണ് മരക്കാർ നേടിയത്. കേരളത്തിൽ 631 റിലീസിങ് സ്ക്രീനുകളാണ് ഉള്ളത്. ഇതിൽ 626 സ്ക്രീനുകളിലും നാളെ മരക്കാർ ആണ് റിലീസ് ചെയ്യുന്നത്. കേരളത്തിലും ഇത്രധികം സ്ക്രീനുകളിൽ ഒരു സിനിമ റിലീസ് ചെയ്യുന്നതും ഇത് ആദ്യമായിട്ടാണ്. അതിന് പുറമെയാണ് ലോകമെമ്പാടുമുള്ള 4000ത്തിലധികം സ്ക്രീനുകളിൽ ഒരു മലയാള സിനിമ പ്രദർശനത്തിന് ഇടം നേടുന്നത്.
Comments