ന്യൂഡൽഹി: രാജ്യത്ത് 9,765 കൊറോണ വൈറസ് കേസുകൾ കൂടി സ്ഥിരീകരിച്ചു. ഇതോടെ ഇന്ത്യയിൽ ആകെ റിപ്പോർട്ട് ചെയ്യപ്പെടുന്ന രോഗികളുടെ എണ്ണം 3.45 കോടിയായി. കഴിഞ്ഞ ദിവസങ്ങളിലുണ്ടായ 477 മരണങ്ങൾ കൂടി കൊറോണ മൂലമാണെന്ന് കണ്ടെത്തിയിട്ടുണ്ട്. ഇതോടെ രാജ്യത്ത് ഇതുവരെ മഹാമാരി ബാധിച്ച് ജീവൻ പൊലിഞ്ഞവരുടെ എണ്ണം 4,69,247 ആയി.
കഴിഞ്ഞ 24 മണിക്കൂറിനിടെ 10,207 കൊറോണ രോഗികൾക്കാണ് രോഗം ഭേദമയത്. ഇതോടെ രോഗമുക്തി നിരക്ക് 98.35 ശതമാനമായി ഉയർന്നു. 2020 മാർച്ചിന് ശേഷമുള്ള ഏറ്റവും ഉയർന്ന രോഗമുക്തി നിരക്കാണിത്. രാജ്യത്ത് 99,763 സജീവ രോഗികളാണ് നിലവിൽ ചികിത്സയിൽ കഴിയുന്നത്. രോഗം വ്യാപന തോത് കുറയുന്ന രീതിയാണ് പൊതുവെ തുടരുന്നതെങ്കിലും പരമാവധി ആളുകളിലേക്ക് വാക്സിൻ എത്തിക്കുകയാണ് കേന്ദ്ര ആരോഗ്യമന്ത്രാലയത്തിന്റെ ലക്ഷ്യം. ഇതിനോടകം 124.96 കോടി വാക്സിൻ ഡോസുകൾ രാജ്യത്ത് വിതരണം ചെയ്ത് കഴിഞ്ഞു.
അതേസമയം പുതിയ വകഭേദമായ ഒമിക്രോണിന്റെ ഭീതിയിലാണ് ഇന്ത്യയുൾപ്പെടെയുള്ള രാജ്യങ്ങൾ. നിലവിൽ ഇന്ത്യയിൽ രോഗം കണ്ടെത്തിയിട്ടില്ലെങ്കിലും ഇരുപതോളം രാജ്യങ്ങളിൽ ഒമിക്രോൺ സ്ഥിരീകരിച്ചതിനാൽ കർശന സുരക്ഷ പാലിക്കണമെന്നാണ് നിർദേശം. ഏറ്റവും ഒടുവിൽ അമേരിക്കയിലും യുഎയിലുമാണ് പുതിയതായി രോഗം സ്ഥിരീകരിച്ചിരിക്കുന്നത്. ജർമനി, ഇറ്റലി, യൂറോപ്പ്, ദക്ഷിണാഫ്രിക്ക തുടങ്ങി വിവിധ രാജ്യങ്ങളിൽ നേരത്തെ ഒമിക്രോൺ സാന്നിധ്യം കണ്ടെത്തിയിരുന്നു.
Comments