ഇസ്ലാമാബാദ്: പാകിസ്താനിലെ ഇമ്രാൻ ഖാൻ സർക്കാരിന് ഹാക്കർമാരുടെ വക എട്ടിന്റെ പണി. സെർബിയയിലെ പാക് എംബസിയുടെ ഔദ്യോഗിക ട്വിറ്റർ അക്കൗണ്ടാണ് ഹാക്കർമാർ ചോർത്തിയത്. ഇമ്രാൻ ഖാൻ സർക്കാരിനെതിരായ ട്വീറ്റുകൾ തുടർച്ചയായി പ്രത്യക്ഷപ്പെട്ടതോടെയാണ് പണി പാളിയ വിവരം അധികൃതർ അറിഞ്ഞത്.
മൂന്ന് മാസത്തോളമായി ശമ്പളമില്ല, ഫീസ് കൊടുക്കാത്തതിന് കുട്ടികൾ സ്കൂളിൽ നിന്ന് പുറത്താകും. ഇതാണോ പുതിയ പാകിസ്താൻ എന്ന് ചോദിക്കുന്നതായിരുന്നു ഒരു ട്വീറ്റ്. നാണയപ്പെരുപ്പം അതിന്റെ എല്ലാ റെക്കോഡുകളും ഭേദിച്ച് മുന്നേറുകയാണെന്നും ശമ്പളമില്ലാതെ സർക്കാർ ഉദ്യോഗസ്ഥർ മൗനികളായി ഇനിയും ജോലിയെടുക്കുമെന്ന് എങ്ങനെ പ്രതീക്ഷിക്കുന്നുവെന്നും ട്വീറ്റിൽ ചോദിക്കുന്നു.
ഇമ്രാൻ ഖാനെ ട്രോളുന്ന സംഗീത വീഡിയോ ആയിരുന്നു തുടർന്ന് പ്രത്യക്ഷപ്പെട്ടത്. ക്ഷമിക്കണം ഇമ്രാൻ ഖാൻ, വേറെ വഴിയൊന്നും ഇല്ല എന്ന അപേക്ഷയോടെയായിരുന്നു സംഗീത വീഡിയോ പോസ്റ്റ് ചെയ്തത്. ആരാണ് ട്വിറ്റർ അക്കൗണ്ട് കൈകാര്യം ചെയ്യുന്നതെന്ന് ഉൾപ്പെടെയുളള കമന്റുകളും ട്വീറ്റിന് അടിയിൽ പ്രത്യക്ഷപ്പെട്ടിരുന്നു. നിരാശ കൊണ്ടാണെന്നായിരുന്നു ചിലരുടെ പ്രതികരണം.
എന്താണ് സംഭവിച്ചതെന്ന് അറിയാതെ സർക്കാരും അങ്കലാപ്പിലായി. മണിക്കൂറുകൾക്ക് ശേഷം അക്കൗണ്ട് ഹാക്ക് ചെയ്യപ്പെട്ടതായി പ്രധാനമന്ത്രിയുടെ ഡിജിറ്റൽ മീഡിയ കാര്യങ്ങൾ നോക്കുന്ന ഡോ. അർസ് ലാൻ ഖാലിദ് വ്യക്തമാക്കി. വിഷയത്തിൽ പാക് വിദേശകാര്യമന്ത്രാലയം അന്വേഷണം നടത്തുമെന്നും അർസ് ലാൻ കൂട്ടിച്ചേർത്തു.
