ലക്നൗ: ഒരു കുടുബമുളളവർക്കേ ജനങ്ങളുടെ ബുദ്ധമുട്ട് മനസ്സിലാക്കാൻ കഴിയൂവെന്ന എസ്പി നേതാവ് അഖിലേഷ് യാദവിന്റ പരിഹാസത്തിന് ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ മറുപടി. സംസ്ഥാനത്തെ 25 കോടി പൗരന്മാരും തന്റെ ‘കുടുംബം’ ആണെന്ന് ആയിരുന്നു യോഗിയുടെ മറുപടി. ചന്ദൗലിയിൽ വിവിധ പദ്ധതികൾ ഉദ്ഘാടനം ചെയ്ത ശേഷം ജനക്കൂട്ടത്തെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
സ്വന്തം കുടുംബം മാത്രം വികസിപ്പിച്ചവർക്ക് കുടുംബത്തിന്റെ യഥാർത്ഥ അർത്ഥം മനസ്സിലായില്ല. ഉത്തർപ്രദേശിലെ ജനങ്ങളാണ് എന്റെ കുടുംബം. കഴിഞ്ഞ ദിവസം എസ്പി അധ്യക്ഷൻ അഖിലേഷ് യാദവ് മുഖ്യമന്ത്രി യോഗി ആദിത്യനാഥിനെതിരെ ‘കുടുംബമില്ല’ എന്ന് ആരോപിച്ച് പരിഹസിച്ചിരുന്നു. ‘സമാജ്വാദി വിജയ് യാത്ര’യുടെ ഭാഗമായി ബന്ദയിൽ നടന്ന റാലിയെ അഭിസംബോധന ചെയ്തുകൊണ്ടായിരുന്നു പരിഹാസം.
ഒരു കുടുംബമുള്ളവർക്ക് മാത്രമേ ജനങ്ങളുടെ വേദന മനസ്സിലാക്കാൻ കഴിയൂ എന്ന് വാദിച്ചു. കോവിഡ് ലോക്ക്ഡൗൺ സമയത്ത് വീട്ടിലേക്ക് നടന്നുപോയ കുടിയേറ്റ തൊഴിലാളികളുടെ അസ്ഥയെക്കുറിച്ച് പറഞ്ഞ അദ്ദേഹം, കുടിയേറ്റ തൊഴിലാളികളോ കർഷകരോ ഉൾപ്പെടെ ദുരിതമനുഭവിക്കുന്നവർക്ക് സഹായം നൽകിയത് സമാജ്വാദി പാർട്ടി മാത്രമാണെന്ന് അവകാശപ്പെട്ടിരുന്നു.
