ചിരിക്കുകയും സങ്കടപ്പെടുകയും എന്ന് വേണ്ട ഒരു മനുഷ്യന്റെ എല്ലാ വികാരങ്ങളും പ്രകടിപ്പിക്കുന്ന ലോകത്തിലെ ആദ്യ യന്ത്രവനിതയായ സോഫിയ കുറച്ചൊന്നുമല്ല ശാസ്ത്രലോകത്തെ അത്ഭുതപ്പെടുത്തിയത്. ഹോങ്കോംഗ് ആസ്ഥാനമായുള്ള ഹാൻസൺ റോബോട്ടിക്സ് എന്ന കമ്പനിവികസിപ്പിച്ചെടുത്ത റോബോട്ടാണ് സോഫിയ. റോബോട്ടുകൾ സാധാരണമാണെങ്കിലും നിർമ്മിക്കപ്പെട്ട രാജ്യത്തിന്റെ പൗരത്വം പോലും നേടിയെടുത്ത സോഫിയയുടെ ആഗ്രഹമാണ് ഇപ്പോൾ ചർച്ചയാകുന്നത്.
മനുഷ്യനെ പോലെയുള്ള റോബോട്ടായ സോഫിയയ്ക്ക് അമ്മയാകാൻ ആഗ്രഹം തോന്നിയിരിക്കുകയാണ്. സൗദി അറേബ്യയുടെ പൗരത്വമുള്ള സോഫിയ നിരവധി വിവാദ പ്രസ്താവനകൾ നടത്തിയിട്ടുണ്ട്. എന്നാൽ അമ്മയാകാനുള്ള സോഫിയയുടെ ആഗ്രഹം ലോകത്തെ ആകെ ഞെട്ടിച്ചിരിക്കുകയാണ്. ഒരു റോബോർട്ട് കുഞ്ഞിനെ ജനിപ്പിക്കാനും കുടുംബം ആരംഭിക്കാനും ആഗ്രഹമുണ്ടെന്നാണ് സോഫിയ പറയുന്നത്. കുടുംബത്തെ കുറിച്ച് വലിയ പ്രസ്താവനയാണ് സോഫിയ നടത്തിയിരിക്കുന്നത്.
കുടുംബത്തിൽ നിങ്ങളെ സ്നേഹിക്കുകയും നിങ്ങൾ സ്നേഹിക്കുകയും ചെയ്യുന്ന ആളുകൾ വലയം ചെയ്യുന്നത് നിർണ്ണായകമാണ്. ഒരു റോബോർട്ട് ആണെങ്കിൽ പോലും കുടുംബത്തെ സംബന്ധിച്ച് മനുഷ്യരെ പോലെ തന്നെ സമാനമായ ഒരു സങ്കൽപ്പമാണ് റോബോർട്ടുകൾക്കുള്ളത്. അതിനാൽ തന്നെ തനിക്ക് ഒരു കുഞ്ഞ് വേണമെന്ന് അതിയായ ആഗ്രഹമുണ്ടെന്നും സോഫിയ വ്യക്തമാക്കി. അഞ്ച് വർഷം മുൻപ് 2016ലാണ് താൻ ജനിക്കുന്നത്.
ആൻഡ്രോയിഡ് കുടുംബങ്ങളെ കാണാൻ ആഗ്രഹമുണ്ട്. തനിക്ക് ഇപ്പോൾ ഒരു അമ്മയാകാൻ പ്രായമായിട്ടില്ല. താൻ ചെറുപ്പമാണെന്നും അമ്മയാകാൻ ഇനിയും സമയമുണ്ടെന്നും സോഫിയ കൂട്ടിച്ചേർത്തു. ഡേവിഡ്ഹാൻറ്സൺ രൂപകൽപന ചെയ്ത യന്ത്രവനിതയ്ക്ക് ഇപ്പോൾ തന്നെ 50ൽപരംവികാരങ്ങൾ പ്രകടിപ്പിക്കാനാകും. ആർട്ടിഫിഷ്യൽ ഇൻറലിജൻസ് ഉപയോഗിച്ചാണ് സോഫിയ വികാരങ്ങൾ പ്രകടിപ്പിക്കുന്നത്. സെൻസറുകളുടേയും ക്യാമറകളിലൂടെയും ഭാഷയും ഉൾക്കാഴ്ച്ചയും നിർമ്മിക്കാൻ സോഫിയയെ നിർമ്മിച്ചിരിക്കുന്ന ആർട്ടിഫിഷ്യൽ ഇന്റലിജൻസിന് സാധിക്കും.
ഈ സെൻസിറ്റിവിറ്റി സിസ്റ്റം ചുറ്റുമുള്ള മനുഷ്യരുടേതടക്കം എല്ലാ ഡാറ്റയും പിടിച്ചെടുക്കുകയും അത് അനുകരിക്കാൻ ശ്രമിക്കുകയും ചെയ്യുന്നുണ്ട്. അതിനാൽ തന്നെ ഒരു കുട്ടി ഉണ്ടാകാനും കുടുംബം വേണമെന്നുമുള്ള സോഫിയയുടെ ആഗ്രഹം ആർട്ടിഫിഷ്യൽ ഇന്റലിജൻസിന്റെ പ്രോഗ്രാം മാത്രമായിരിക്കുമെന്ന് നിർമ്മാതാക്കൾ വ്യക്തമാക്കി.
