ഡിസ്പൂർ: ചായ ഇഷ്ടപെടാത്ത ആളുകൾ ചുരുക്കമാണ്. മനുഷ്യന്റെ ചായഭ്രമം മൂലം നിരവധി കമ്പനികൾ വിവിധ തരത്തിലുള്ള തേയിലകളും ഇന്ന് വിപണിയിൽ ഇറക്കുന്നു. വ്യത്യസ്ത പേരുകളിലും, രുചിയിലും, മണത്തിലും എത്തുന്ന തേയിലകൾക്ക് ആവശ്യക്കാരും ഏറെയാണ്. ചായ ഇഷ്ടപ്പെടുന്ന ആളുകൾ വില നോക്കാതെ തേയില വാങ്ങുന്നതും സ്ഥിരം കാഴ്ചയാണ്. എന്നാൽ ഇപ്പോൾ വാർത്തകളിൽ ഇടംപിടിക്കുന്നത് സാധരണ ഒരു തേയിലയല്ല. വിലയുടെ കാര്യത്തിൽ സ്വന്തം റെക്കോർഡുകൾ തന്നെ തകർത്തുകൊണ്ട് ഇരിക്കുന്ന ആഡംബര തേയിലയാണ് ഇന്നത്തെ താരം.
തേയില കൃഷിക്ക് പേരുകേട്ട സ്ഥലമാണ് അസം. ഇവിടെ നിർമ്മിക്കുന്ന അപൂർവ്വം ഇനം തേയിലയാണ് ‘മനോഹരി ഗോൾഡ് ടീ’. കഴിഞ്ഞ ദിവസം നടന്ന ലേലത്തിൽ ഈ മനോഹരി തേയില വിറ്റ് പോയത് 99,999 രൂപയ്ക്കാണ്. അതായത് ഒരു കിലോ തേയിലയ്ക്ക് ഒരു ലക്ഷം രൂപ. ലേലത്തിൽ ഇതിന് മുൻപ് 75,000 രൂപ വരെ നേടി റെക്കോർഡിട്ടിട്ടുണ്ട് മനോഹരി തേയില. എന്നാൽ ഈ വർഷം അതിലും കൂടുതൽ തുകയ്ക്ക് വിറ്റഴിഞ്ഞ് സ്വന്തം റെക്കോർഡ് തകർത്തിരിക്കുകയാണ് ഈ തേയില.
കഴിഞ്ഞ ദിവസം നടന്ന ലേലത്തിൽ സൗരവ് ടീ ട്രേഡേഴ്സ് എന്ന കമ്പനിയാണ് മനോഹരി തേയില വാങ്ങിയത്. അപ്പർ അസമിലെ ദിബ്രുഗഡ് ജില്ലയിലെ മനോഹരി ടീ എസ്റ്റേറ്റിലാണ് മനോഹരി ഗോൾഡ് ടീ ഉൽപാദിപ്പിക്കുന്നത്. 2018ൽ, കിലോയ്ക്ക് 39,001 രൂപയ്ക്കാണ് മനോഹരി ഗോൾഡ് ടീ വിറ്റത്. പിന്നീട് നടന്ന ലേലങ്ങളിൽ എല്ലാം തന്നെ വിലയുടെ കാര്യത്തിൽ ഈ തേയിലയെ ആരും മറികടന്നിട്ടില്ല.
200 വർഷമായി തേയില കൃഷിയിൽ മുൻപന്തിയിൽ നിൽക്കുന്ന പ്രദേശങ്ങളിൽ ഒന്നാണ് അസം. കൂടാതെ അസം തേയില ലോകത്ത് തന്നെ കീർത്തിയാർജ്ജിച്ചതാണ്. റിപ്പോർട്ടുകൾ പ്രകാരം, 2016-17ൽ 17.41 കോടി കിലോ തേയില ഗുവാഹത്തി തേയില ലേല കേന്ദ്രത്തിൽ വിറ്റു, 2017-18ൽ 18.44 കോടി കിലോ, 2018-19ൽ 18.29 കോടി, 2019ൽ 16.22 കോടി കിലോ എന്നിങ്ങനെയാണ് വിറ്റഴിഞ്ഞ കണക്കുകൾ. ഗുവാഹത്തി തേയില ലേല കേന്ദ്രത്തിന് കീഴിൽ ആകെ 1241 തേയിലത്തോട്ടങ്ങളും 244 ഉപഭോക്താക്കളും രജിസ്റ്റർ ചെയ്തിട്ടുണ്ട്.
Comments