2022-നായി കാത്തിരിക്കുകയാണ് ഐഫോൺ ആരാധകർ.ഐഫോൺ 14 സീരീസിന്റെ വരവ് തന്നെ ഇതിന് കാരണം.പുതിയ സീരീസ് പ്രഖ്യാപിച്ചത് മുതൽ ഫീച്ചറുകളെ ചുറ്റിപറ്റി നിരവധി അഭ്യൂഹങ്ങളും പരന്നിരുന്നു.പുതിയ റിപ്പോർട്ടുകൾ പ്രകാരം ഐഫോണിൽ 48 മെഗാ പിക്സൽ ക്യാമറയുണ്ടെന്നാണ് വിവരം.ഐഫോൺ 13 വരെയുള്ള സീരീസുകളിൽ ആപ്പിൾ 12 മെഗാപിക്സലുള്ള സെൻസറുകളാണ് നൽകി വന്നിരിക്കുന്നത്. എന്നാൽ പുതിയ സീരീസിൽ 48 മെഗാപിക്സലുള്ള ക്യാമറയെ കൂടാതെ 12 മെഗാപിക്സൽ വീതമുള്ള അൾട്രാ -വൈഡ്, ടെലിഫോട്ടോ ലെൻസുകളും പ്രതീക്ഷിക്കാമെന്നാണ് വിവരം.
ഇങ്ങനെ ഒട്ടനവധി അഭ്യൂഹങ്ങൾ ഐഫോണിനെ പറ്റി പരക്കുമ്പോൾ ഏറ്റവും ശ്രദ്ധയാകർഷിക്കുന്നത് ഒരു പ്രവചനമാണ്. ഐഫോൺ എസ്ഇ 5 ജി (2022) വരുമ്പോൾ നൂറുകോടിയിലേറെ ഉപയോക്താക്കൾ ആൻഡ്രോയിഡ് ഫോൺ ഉപേക്ഷിച്ച് ആപ്പിളിനൊപ്പം ചേരുമെന്നാണ് പ്രവചനം.
മുൻനിര ഗവേഷണ കമ്പനിയായ ജെപി മോർഗൻ ആണ് ഇത്തരമൊരു പ്രവചനം നടത്തിയിരിക്കുന്നത്.പ്രവചനങ്ങളുടെ കൃത്യതയ്ക്ക് 5 സ്റ്റാറും ലഭിച്ച കമ്പനിയാണ് പ്രവചനം നടത്തിയതെന്ന് ഓർക്കുമ്പോഴാണ് പറഞ്ഞതൊക്കെ ശരിയാകുമെന്ന് ഉറപ്പിക്കുന്നത്.
പ്രവചനം ശരിയായി വരികയാണെങ്കിൽ അത് ഷവോമി,വാവെയ്,സാംസങ് തുടങ്ങിയ ആൻഡ്രോയിഡ് സ്മാർട്ട് ഫോൺ നിർമ്മാതാക്കളെയായിരിക്കും പ്രധാനമായും ബാധിക്കുക.പ്രീമിയം ഫോണുകളിലെ വിൽപ്പനയിലാണ് ആപ്പിളിന്റെ ഇപ്പോഴത്തെ മേൽക്കോയ്മ.ഇത് ഇനി മദ്ധ്യനിര ഫോണുകളിലേക്കും എത്തുമെന്നാണ് ജെപി മോർഗൻ പറയുന്നത്.
ട്രേഡ് ഇൻ പ്രോഗ്രാമുകളിലൂടെയാണ് ഐഫോൺ കൂടുതൽ ആളുകളിലേക്ക് എത്തുകയെന്നാണ് വിലയിരുത്തൽ.പഴയ ഫോണും പണവും നൽകി പുതിയ ഫോൺ കൊണ്ടുപോകാൻ അനുവദിക്കുന്ന പദ്ധതികളെയാണ് ട്രേഡ് ഇൻ പ്രോഗ്രാമുകൾ എന്ന് വിളിക്കുന്നത്.ഇത്തരത്തിൽ ട്രേഡ് ഇൻ ഓഫറുകൾ സ്വീകരിച്ച് 140 കോടിയോളം ആൻഡ്രോയിഡ് ഉപയോക്താക്കൾ ആപ്പിളിനോടൊപ്പം ചേരുമെന്നാണ് പ്രവചനം.എന്തായാലും ഐഫോണിന്റെ സൗകര്യങ്ങളിൽ മയങ്ങി എത്ര പേർ ആൻഡ്രോയിഡ് ഫോണുകൾ ഉപേക്ഷിക്കുമെന്ന് കാത്തിരുന്ന് കാണാം.
Comments