ന്യൂഡൽഹി : പെൺകുട്ടികളുടെ വിവാഹ പ്രായം 21 ആക്കാനുള്ള കേന്ദ്രസർക്കാർ തീരുമാനത്തെ എതിർക്കുന്നവർക്കെതിരെ ആഞ്ഞടിച്ച് കേന്ദ്ര ന്യൂനപക്ഷകാര്യ മന്ത്രി മുക്താർ അബ്ബാസ് നഖ്വി. താലിബാൻ ചിന്താഗതിയാണ് ഇത്തരക്കാർക്കുള്ളതെന്ന് അദ്ദേഹം പറഞ്ഞു. മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം.
വിവാഹ പ്രായം ഉയർത്തുന്നതിനെതിരെ ഉയരുന്ന എതിർപ്പുകൾ ഞെട്ടൽ ഉണ്ടാക്കുന്നു. വിവാഹ പ്രായം 21 ആയി ഉയർത്തിയാൽ പെൺകുട്ടികൾ വഴിതെറ്റിപ്പോകുമെന്നാണ് ഇത്തരക്കാർ വിചാരിക്കുന്നത്. ഇത്തരത്തിൽ ചിന്തിക്കുന്നവർക്ക് താലിബാൻ മനസ്ഥിതിയാണെന്നും മുക്താർ അബ്ബാസ് നഖ്വി വ്യക്തമാക്കി.
ഭരണഘടനാ തത്വങ്ങൾ അനുസരിച്ചാണ് രാജ്യം മുന്നോട്ട് പോകുന്നത്. സ്ത്രീകളുടെ അവകാശങ്ങളെയൊന്നും തന്നെ താലിബാൻ മനസ്ഥിതിയുള്ളവരുടെ ചിന്തകൾക്ക് ഹനിക്കാൻ കഴിയില്ല. സ്ത്രീ ശാക്തീകരണത്തിനായി സ്ത്രീകളെ സമൂഹ്യമായും, വിദ്യാഭ്യാസപരമായും ശക്തിപ്പെടുത്തേണ്ടത് അത്യാവശ്യമാണ്. സ്ത്രീ ശാക്തീകരണത്തിനായി വിവാഹപ്രായത്തിൽ ഇസ്ലാമിക രാജ്യങ്ങൾ ഉൾപ്പെടെ മാറ്റം കൊണ്ടുവന്നിട്ടുണ്ടെന്നും അദ്ദേഹം കൂട്ടിച്ചേർത്തു.
