തിരുവനന്തപുരം : സംസ്ഥാനത്ത് വരും ദിവസങ്ങളിൽ റാലികൾക്കും മൈക്ക് അനൗൺസ്‌മെന്റുകൾക്കും നിയന്ത്രണം. സംസ്ഥാന പോലീസ് മേധാവി അനിൽ കാന്താണ് ഇതുമായി ബന്ധപ്പെട്ട നിർദ്ദേശം പുറപ്പെടുവിച്ചത്. മൂന്ന് ദിവസത്തേക്കാണ് നിയന്ത്രണം. അവധിയിൽ പോയ പോലീസുകാരോട് തിരികെ ജോലിയിൽ പ്രവേശിക്കാനും അദ്ദേഹം നിർദ്ദേശം നൽകി.
ആലപ്പുഴയിലുണ്ടായ കൊലപാതകങ്ങളുടെ പശ്ചാത്തലത്തിലാണ് നടപടി. കൊലപാതകങ്ങളുടെ പശ്ചാത്തലത്തിൽ മറ്റ് ജില്ലകളിലേക്കും അക്രമം വ്യാപിക്കാൻ സാദ്ധ്യതയുണ്ടെന്നാണ് പോലീസ് വിലയിരുത്തൽ. അതുകൊണ്ടുതന്നെ ഇത് ഒഴിവാക്കുക ലക്ഷ്യമിട്ടാണ് അനിൽ കാന്ത് നിർദ്ദേശം പുറപ്പെടുവിച്ചത്.
പ്രകോപനപരമായ റാലികൾ സംഘടിപ്പിക്കുകയോ, അല്ലെങ്കിൽ പരിപാടികളിൽ പ്രകോപനപരമായ മുദ്രാവാക്യങ്ങൾ വിളിക്കുകയോ ചെയ്താൽ അത് വലിയ അക്രമങ്ങൾക്ക് കാരണമാകും. ഈ സാഹചര്യത്തിലാണ് റാലികൾക്കും മൈക്ക് അനൗൺസ്‌മെന്റുകൾക്കും നിയന്ത്രണം ഏർപ്പെടുത്തിയിരിക്കുന്നത്. സാധാരണയായി റാലികൾക്കും മറ്റും അനുമതി നൽകേണ്ടത് പോലീസ് ആണ്. പരിശോധിച്ച ശേഷം മാത്രമേ ഇത്തരത്തിൽ അനുമതി നൽകാവൂ എന്നും നിർദ്ദേശം നൽകിയിട്ടുണ്ട്.
എല്ലാ ജില്ലകളിലും പലഭാഗങ്ങളിലായി പരമാവധി പോലീസുകാരെ വിന്യസിച്ചിരിക്കുകയാണ്. അതുകൊണ്ടുതന്നെ അവധിയിൽ പോയവർ തിരികെ പ്രവേശിക്കണമെന്നും സംസ്ഥാന പോലീസ് മേധാവി വ്യക്തമാക്കുന്നു. എസ്പിമാരുൾപ്പെടെയുള്ള ഉന്നത പോലീസ് ഉദ്യോഗസ്ഥരോട് സ്‌റ്റേഷനുകളിൽ തന്നെ ഇരിക്കാനും, കീഴുദ്യോഗസ്ഥർക്ക് ആവശ്യമായ നിർദ്ദേശങ്ങൾ നൽകാനും സംസ്ഥാന പോലീസ് മേധാവി അറിയിച്ചിട്ടുണ്ട്.
