ദുബായ്: അണ്ടർ 19 ക്രിക്കറ്റ് ലോകകപ്പിലും ഏഷ്യാകപ്പിലും യു.എ.ഇയെ മലയാളി ബാലൻ നയിക്കും. കണ്ണൂർ പഴയങ്ങാടി മാട്ടൂൽ സ്വദേശി അലിഷാൻ ഷറഫുദ്ധീനാണ് യു.എ.ഇ അണ്ടർ 19 ടീം ക്യാപ്റ്റനായി തിരഞ്ഞെടുക്കപ്പെട്ടിട്ടുള്ളത്. ആദ്യമായാണ് ഒരു മലയാളി യു.എ.ഇ ക്രിക്കറ്റ് ടീമിനെ നയിക്കുന്നത്.
ഏഷ്യാകപ്പിൽ ഇന്ത്യക്കെതിരെ ഡിസംബർ 23-ന് ദുബായിൽ നടക്കുന്ന മത്സരത്തിലാണ് അലിഷാന്റെ നായകനായുള്ള അരങ്ങേറ്റം.യു.എ.ഇ സീനിയർ ടീമിലും അംഗമായ വലംകയ്യൻ ബാറ്റ്‌സ്മാനായ അലിഷാൻ ഷറഫുദ്ധീൻ ബൗളും ചെയ്യും. അന്താരാഷ്‌ട്ര ക്രിക്കറ്റിൽ ആറ് ട്വന്റി ട്വന്റിയിലും ഒരു ഏകദിനത്തിലും ഈ 18-കാരൻ കളിച്ചിട്ടുണ്ട്.
15 വയസുമുതൽ യു.എ.ഇ അണ്ടർ 19 ടീമിൽ കളിക്കുന്നുണ്ട്. വിരാട് കോഹ്ലിയുടെ ആരാധകനായ അലിഷാൻ ഇന്ത്യയ്‌ക്കെതിരെയടക്കമുള്ള വരും മത്സരങ്ങളെ പ്രതീക്ഷയോടെയാണ് നോക്കിക്കാണുന്നത്. ദുബായ് ഡിമോൺഫോർട്ട് യൂണിവേഴ്‌സിറ്റി സൈബർ സെക്യൂരിറ്റി വിദ്യാർത്ഥിയാണ്.
