മുംബൈ: ദക്ഷിണ കൊറിയൻ വാഹന നിർമ്മാതാക്കളായ ഹ്യുണ്ടായിയുടെ ജനപ്രിയ മോഡലാണ് വെന്യൂ. ഇപ്പോഴിതാ ഈ സബ് പോംപാക്ട് എസ് യുവി പുതിയ ഒരു നേട്ടം കൈവരിച്ചിരിക്കുകയാണ്. വാഹനം വിപണിയിലെത്തി 31 മാസങ്ങൾ പിന്നിടുമ്പോൾ, 2.5 ലക്ഷം വെന്യൂ വിറ്റതായി നിർമ്മാതാക്കൾ അറിയിച്ചു. 2019ലാണ് ഹ്യുണ്ടായി വെന്യൂ ഇന്ത്യയിൽ അവതരിപ്പിച്ചത്. വാഹനം നിരത്തിലെത്തി വെറും ആറ് മാസങ്ങൾ കൊണ്ട് അര ലക്ഷം വെന്യൂവിന്റെ വിൽപന പൂർത്തിയായതായി നിർമ്മാതാക്കൾ അറിയിച്ചിരുന്നു.
2019-2020 വർഷങ്ങളിൽ ഇന്ത്യയിൽ വാഹന വിപണി ഇടിഞ്ഞപ്പോഴും, വെന്യൂ കൈവരിച്ച ഈ നേട്ടം വാഹനത്തിന്റെ ജനപ്രീതിയെയാണ് എടുത്ത് കാട്ടുന്നതെന്ന് നിർമ്മാതാക്കൾ പറഞ്ഞു. മെയ് 2019ൽ നിരത്തിലെത്തിയ വാഹനം, ജൂൺ 2020ൽ ഒരു ലക്ഷം യൂണിറ്റുകളുടെ വിൽപന പൂർത്തിയാക്കിയിരുന്നു. കിയ സോണറ്റിനോടും, മാരുതി സുസുക്കി വിറ്റാര ബ്രെസയോടുമായിരുന്നു സബ് കോംപാക്ട് എസ് യുവി വിഭാഗത്തിൽ വെന്യൂ ഏറ്റുമുട്ടിയത്. എന്നാൽ ഇന്ന് വാഹനം വിറ്റഴിഞ്ഞ കണക്കുകൾ പ്രകാരം, എതിരാളികൾക്ക് വെല്ലുവിളിയായാണ് വെന്യൂ മുന്നേറുന്നതെന്നും നിർമ്മാതാക്കൾ അഭിപ്രായപ്പെട്ടു.
ഹ്യുണ്ടായി ഇന്ത്യയിലെത്തിക്കുന്ന ആദ്യ കണക്ടഡ് എസ് യുവിയായാണ് വെന്യൂ അവതരിപ്പിച്ചിരുന്നത്. ബ്ലൂലിങ്ക് സാങ്കേതികവിദ്യയുടെ അടിസ്ഥാനത്തിൽ 33 സുരക്ഷ ഫീച്ചറുകളും നിരവധി സെഗ്മെന്റ് ഫസ്റ്റ് ഫീച്ചറുകളുമുണ്ട് വാഹനത്തിൽ. രണ്ട് പെട്രോൾ എൻജിനും ഒരു ഡീസൽ എൻജിനും കരുത്ത് പകരുന്ന വെന്യൂവിന് ആകെ 13 വേരിയന്റുകളുണ്ട്. ക്രൂയിസ് കൺട്രോൾ, ആറ് എയർബാഗ്, സ്പീഡ് സെൻസിങ് ഡോർ ലോക്ക്, എബിഎസ് വിത്ത് ഇഎസ്സി, ഹിൽ അസിസ്റ്റ് കൺട്രോൾ എന്നിവയാണ് വാഹനത്തിന് സുരക്ഷയൊരുക്കുന്നത്.
1.0 ലിറ്റർ ടർബോ പെട്രോൾ, 1.2 ലിറ്റർ പെട്രോൾ, 1.4 ലിറ്റർ ഡീസൽ എന്നീ മൂന്ന് എൻജിൻ ഓപ്ഷനുകളിലാണ് ഹ്യുണ്ടായി വെന്യു ആദ്യമെത്തിയത്. പിന്നീട് ബിഎസ്-6 നിലവാരത്തിലേക്ക് മാറിയതോടെ ഡീസൽ എൻജിൻ ശേഷി 1.5 ലിറ്ററായി ഉയർത്തി. 1.0 ലിറ്റർ ടർബോ എൻജിൻ മോഡലാണ് ഏറ്റവുമധികം ജനപ്രീതി നേടിയത്. 6.99 ലക്ഷം മുതൽ 11.86 ലക്ഷം വരെയാണ് വെന്യൂവിന്റെ എക്സ് ഷോറൂം വില.
Comments