മലയാളികളുടെ സൂപ്പർഹീറോ മിന്നൽ മുരളി പ്രേക്ഷകരുടെ മുന്നിലെത്താൻ ഇനി മണിക്കൂറുകൾ മാത്രമെ ബാക്കിയുള്ളു. ചിത്രത്തിന്റെ നിരവധി വിശേഷങ്ങൾ കുറെ നാളായി പുറത്തുവരുന്നുണ്ട്. കൂടാതെ, ചിത്രത്തിന്റെ ടീസർ, ട്രെയിലർ, തുടങ്ങിയവ സമൂഹ മാദ്ധ്യമങ്ങളിൽ വൈറലായിരുന്നു. ഇപ്പോഴിതാ കേരള പോലീസ് വേർഷനിൽ മിന്നൽ മുരളിയെ പുറത്തിറക്കിയിരിക്കുകയാണ് കാക്കിക്കുള്ളിലെ ഒരു കൂട്ടം കലാകാരന്മാർ.
മിന്നൽ മുരളി "കേരള പോലീസ്" വേർഷൻ ⚡⚡#keralapolice Watch full video https://t.co/rdI4Vcwclv pic.twitter.com/MnGWTNBMAn
— Kerala Police (@TheKeralaPolice) December 23, 2021
2.23 മിനിറ്റ് ദൈർഘ്യമുള്ള വീഡിയോയിൽ മിന്നൽ മുരളി എന്ന സിവിൽ പോലീസ് ഓഫീസറാണ് നായകൻ. കുറ്റകൃത്യങ്ങൾ നടക്കുന്ന സ്ഥലങ്ങളിൽ മിന്നൽ വേഗത്തിൽ ഓടിയെത്തുകയും, സ്ത്രീകളെ ശല്യം ചെയ്യുന്നവരെയും റോഡ് നിയമങ്ങൾ പാലിക്കാത്തവരെയും പിടികൂടാനാണ് മിന്നൽ മുരളി പോലീസ് എത്തുന്നത്. വീഡിയോ കേരള പോലീസിന്റെ ഫേസ്ബുക്ക്, ട്വിറ്റർ, ഇൻസ്റ്റാഗ്രാം പേജുകളിൽ പങ്കുവച്ചിട്ടുണ്ട്. കേരള പോലീസിന്റെ ഈ ശ്രമത്തെ അഭിനന്ദിച്ച് നിരവധി പേരാണ് രംഗത്തെത്തിയത്.
സമരഭൂമികളിലെ പോലീസിന്റെ ശക്തമായ ഇടപെടലുകളും വീഡിയോയിൽ കാണിക്കുന്നു. ഫേസ്ബുക്കിൽ പങ്കുവച്ച് ഏതാനും മണിക്കൂറുകൾക്കുള്ളിൽ തന്നെ ലക്ഷത്തോളം പേരാണ് വിഡിയോ കണ്ടത്. എന്നാൽ ഗുണ്ടകളുടെ വിളയാട്ട കേന്ദ്രമായി കേരളം മാറുമ്പോൾ പോലീസ് ഇത്തരത്തിലുള്ള ട്രോൾ വീഡിയോയുമായി എത്തുന്നു എന്ന് വിമർശനങ്ങൾ ഉയരുന്നുണ്ട്. കൂടാതെ, വീഡിയോയിലുള്ളത് പോലെ അക്രമ സംഭവങ്ങൾ നടക്കുമ്പോൾ മുഖം നോക്കാതെ നടപടി എടുക്കാനും, കുറ്റവാളികളെ തൽക്ഷണം പിടികൂടാനും ഇത്തരത്തിലൊരു മിന്നൽ മുരളി പോലീസിനെ ആവശ്യമാണെന്നും അഭിപ്രായങ്ങൾ ഉയരുന്നുണ്ട്.
