റോം: ഭാഗ്യം കൊണ്ട് മാത്രമാണ് പലപ്പോഴും ആളുകൾ പാമ്പ് കടിയിൽ നിന്നും രക്ഷപെടാറുള്ളത്. ഇത്തരത്തിൽ രക്ഷപെട്ട ഓസ്ട്രേലിയയിലെ ക്വീൻസ്ലാൻഡ് സ്വദേശിയുടെ അനുഭവമാണ് ഇപ്പോൾ ചർച്ചയാകുന്നത്. പാമ്പിന്റെ ചിത്രവും സോഷ്യൽ മീഡിയയിൽ പ്രചരിക്കുന്നുണ്ട്. ലോകത്തിലെ ഏറ്റവും വിഷമുള്ള പാമ്പുകളിലൊന്നിനെയാണ് കാറിൽ കണ്ടെത്തിയിരിക്കുന്നത്. അഞ്ചടി നീളമാണ് കാറിൽ കണ്ട പാമ്പിനുണ്ടായിരുന്നത്.
യാത്ര പുറപ്പെട്ട് ഏറെ ദൂരം കഴിഞ്ഞാണ് ഇയാൾ കടയിൽ കയറാനായി വാഹനം നിർത്തിയത്. കടയിൽ കയറി കാറിനടുത്തേയ്ക്ക് മടങ്ങി ഡോർ തുറന്നപ്പോൾ കാണുന്നത് ഉഗ്ര വിഷമുള്ള പാമ്പിനെയാണ്. പരിഭ്രാന്തനായ യുവാവ് ഉടൻ തന്നെ പാമ്പുപിടുത്തക്കാരുടെ സഹായം തേടി. ഗ്ലാഡ്സ്റ്റോൺ റീജിയൻ സ്നേക്ക് ക്യാച്ചേഴ്സിലെ അംഗമായ ഡേവിഡ് വോസാണ് കാർ യാത്രികന്റെ സഹായത്തിനായി എത്തിയത്.
ലോകത്തിലെ തന്നെ ഏറ്റവും വിഷമുള്ള പാമ്പുകളിൽ ഒന്നാണ് ഡ്രൈവറുടെ ശ്രദ്ധയിൽപ്പെടാതെ മണിക്കൂറുകളോളം കാറിൽ കിടന്നതെന്ന് ഡേവിഡ് പറഞ്ഞു. ഈസ്റ്റേൺ ബ്രൗൺ വിഭാഗത്തിൽപ്പെട്ട വിഷപാമ്പുകളിൽ ഒരിനമാണിത്. ഭാഗ്യം കൊണ്ട് മാത്രമാണ് ഇയാൾ രക്ഷപെട്ടത്. ഉഗ്രവിഷത്തിന്റെ കാര്യത്തിൽ ലോകത്ത് രണ്ടാം സ്ഥാനമാണ് ഇവയ്ക്കുള്ളത്. ഏറെ പരിശ്രമിച്ച ശേഷമാണ് പാമ്പിനെ പിടികൂടാനായതെന്നും ഡേവിഡ് പറഞ്ഞു.
