കൊച്ചി: നാലുമാസത്തോളം നീണ്ട ആരാധകരുടെ കാത്തിരിപ്പിന് വിരാമമിട്ട് കരിക്ക് ടീം. ക്രിസ്മസ് ആഘോഷത്തിന്റെ ഭാഗമായി ഇന്ന് വൈകിട്ട് പുറത്തിറക്കിയ ‘കലക്കാച്ചി’ എന്ന് പേരിട്ടിരിക്കുന്ന സീരിസിന്റെ ഒന്നാം ഭാഗം അൽപം വ്യത്യസ്തമായാണ് കരിക്ക് അവതരിപ്പിച്ചിരിക്കുന്നത്. പുറത്തിറക്കി മണിക്കൂറുകൾക്കകം ഏഴുലക്ഷത്തിലധികം ആളുകളാണ് ഇതുവരെ കലക്കാച്ചി കണ്ടത്.
കൃഷ്ണ ചന്ദ്രൻ, ശബരീഷ് സജിൻ, ആനന്ദ് മാത്യൂസ്, രാഹുൽ രാജഗോപാൽ, ജീവൻ സ്റ്റീഫൻ, മിഥുൻ എം ദാസ്, കിരൺ വിയ്യത്ത്, ബിനോയ് ജോൺ, ഉണ്ണി മാത്യൂസ്, റിജു രാജീവ്, ഹരി കെ.സി, സിറാജുദ്ധീൻ, നന്ദിനി, അർജുൻ രത്തൻ, അനു കെ അനിയൻ, വിഷ്ണു, അമൽ അമ്പിളി, വിവേക് , അരൂപ്, ഹരികൃഷ്ണ തുടങ്ങിവരാണ് സീരീസിൽ അഭിനയിക്കുന്നത്.
കരിക്ക് ടീമാണ് കഥയും തിരക്കഥയും. സ്ഥിരം കോമഡികളിൽ നിന്ന് വ്യത്യസ്തമായി മറ്റൊരു തരത്തിലാണ് കലക്കാച്ചിയുടെ നിർമ്മാണം. പതിവ് താരങ്ങൾക്ക് പുറമെ, സിനിമാ താരമായ വിൻസി സോണി അലോഷ്യസും കലക്കാച്ചിയിൽ അഭിനയിച്ചിട്ടുണ്ട്.
