ന്യൂഡൽഹി: രാജ്യത്ത് ബൂസ്റ്റർ ഡോസ് വിതരണം ചെയ്യുമെന്ന പ്രഖ്യാപനം പ്രധാനമന്ത്രി നരേന്ദ്രമോദി നടത്തിയതിന് പിന്നാലെ പ്രതികരണവുമായി കോൺഗ്രസ് നേതാവ് രാഹുൽ ഗാന്ധി. കേന്ദ്ര സർക്കാരിന്റെ തീരുമാനം തന്റെ നിർദേശ പ്രകാരമാണെന്നാണ് രാഹുൽ പ്രതികരിച്ചത്.
‘ഇത് വളരെ ശരിയായ തീരുമാനമാണ്. ബൂസ്റ്റർ ഡോസ് നൽകണമെന്ന എന്റെ നിർദേശം കേന്ദ്ര സർക്കാർ സ്വീകരിച്ചു. വാക്സിന്റെ ഇരുഡോസുകളും ബൂസ്റ്റർ ഷോട്ടും പ്രദാനം ചെയ്യുന്ന സുരക്ഷ ഇനി രാജ്യത്തെ എല്ലാ ജനങ്ങൾക്കും ലഭ്യമാകും’ ട്വിറ്ററിൽ രാഹുൽ ഗാന്ധി പറഞ്ഞു.
ഇന്നലെ രാത്രിയാണ് പ്രധാനമന്ത്രി നരേന്ദ്രമോദി രാജ്യത്തെ ജനങ്ങളെ അഭിസംബോധന ചെയ്ത് നിർണായക പ്രഖ്യാപനം നടത്തിയത്. കൊറോണ മുൻനിരപോരാളികൾക്കും 60 വയസിന് മുകളിലുള്ള രോഗികളായവർക്കുമാണ് ആദ്യഘട്ടത്തിൽ ബൂസ്റ്റർ ഷോട്ട് വിതരണം ചെയ്യുക. മിക്സ് ആൻഡ് മാച്ച് പോളിസി മുഖേനയാണ് വിതരണം.
വ്യത്യസ്ത വാക്സിനുകളാണ് ബൂസ്റ്ററായി നൽകുക. വാക്സിനേഷൻ വേളയിൽ കൊവിഷീൽഡ് സ്വീകരിച്ചവർക്ക് ബൂസ്റ്റർ എടുക്കുമ്പോൾ കൊവാക്സിൻ വിതരണം ചെയ്യുമെന്നും കൊവാക്സിൻ ആദ്യം കുത്തിവെയ്പ്പെടുത്തവർക്ക് ബൂസ്റ്റർ നൽകുമ്പോൾ കൊവിഷീൽഡായിരിക്കുമെന്നും ഇന്ത്യൻ മെഡിക്കൽ അസോസിയേഷൻ അറിയിച്ചു. ഇതുകൂടാതെ 15നും 18നും ഇടയിലുള്ളവർക്കും വാക്സിൻ നൽകുമെന്ന് പ്രധാനമന്ത്രി പറഞ്ഞിരുന്നു.
