ലക്നൗ: ഉത്തർപ്രദേശിലെ പ്രതിരോധ മേഖലയുടെ ഉത്പാദന കേന്ദ്രമാക്കി മാറ്റുമെന്ന് മുഖ്യമന്ത്രി യോഗി ആദിത്യനാഥ്. യുപിയിൽ ബ്രഹ്മോസ് മിസൈൽ നിർമ്മിക്കുമെന്നും ഇതിലൂടെ യുവാക്കൾക്ക് പുതിയ തൊഴിൽ മേഖല സൃഷ്ടിക്കുമെന്നും യോഗി ആദിത്യനാഥ് പറഞ്ഞു.
ബ്രഹ്മോസ് മിസൈലിന്റെ നിർമ്മാണ യൂണിറ്റിന്റേയും ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ ലാബിന്റേയും ശിലാസ്ഥാപന ചടങ്ങിൽ സംസാരിക്കുകയായിരുന്നു യോഗി. ഡിആർഡിഒ ലാബ് ഉത്തർപ്രദേശിനെ പുതിയ തലത്തിലേക്ക് എത്തിക്കും. ഇവിടെ ബ്രഹ്മോസ് മിസൈൽ ഉൾപ്പെടെ നിർമ്മിക്കും. ഇതോടെ രാജ്യത്തെ പ്രതിരോധ ഹബ്ബായി ഉത്തർപ്രദേശ് മാറുമെന്ന് യോഗി പറഞ്ഞു.
ഇന്ത്യ സൗഹൃദത്തിന്റേയും കാരുണ്യത്തിന്റേയും രാജ്യമായാണ് അറിയപ്പെടുന്നത്. അതേസമയം സുരക്ഷയുടെ കാര്യത്തിൽ രാജ്യം ഒരിക്കലും വിട്ടുവീഴ്ച്ച ചെയ്യില്ലെന്നും യോഗി കൂട്ടിച്ചേർത്തു. ആറ് പ്രതിരോധ ഇടനാഴികളിലും ഇതിനോടകം തന്നെ പ്രവർത്തനങ്ങൾ ആരംഭിച്ചിട്ടുണ്ട്. ലക്നൗവിൽ ഡിഫൻസ് എക്സ്പോ സംഘടിപ്പിച്ചിട്ടുണ്ടെന്നും യോഗി ആദിത്യനാഥ് അറിയിച്ചു. പ്രതിരോധ മന്ത്രി രാജ്നാഥ് സിംഗും ചടങ്ങിൽ പങ്കെടുത്തിരുന്നു.
അതേസമയം ഇന്ന് വൈകിട്ട് പ്രയാഗ്രാജിൽ പ്രധാനമന്ത്രി ആവസ് യോജനയുടെ ഭൂമി പൂജ യോഗി ആദിത്യനാഥ് നിർവ്വഹിക്കും. മാഫിയകളിൽ നിന്നും പിടിച്ചെടുക്കുന്ന ഭൂമികളിൽ പാവപ്പെട്ടവർക്ക് വീടുകൾ നിർമ്മിച്ച് നൽകുമെന്ന് യോഗി ആദിത്യ നാഥ് നേരത്തെ അറിയിച്ചിരുന്നു.
