ന്യൂഡൽഹി: പെർഫ്യൂം വ്യാപാരി പിയൂഷ് ജെയിനിന്റെ വസതികളിൽ ഡയറക്ടറേറ്റ് ജനറൽ ഓഫ് ജിഎസ്ടി ഇന്റലിജൻസും (ഡിജിജിഐ) ആദായനികുതി വകുപ്പ് ഉദ്യോഗസ്ഥരും നടത്തിയ റെയ്ഡിൽ ജെയിനിന്റെ കനൗജ് ഹൗസിൽ നിന്ന് കണക്കിൽപ്പെടാത്ത 107 കോടി രൂപ കണ്ടെടുത്തു. റെയ്ഡിൽ കണ്ടെടുത്ത കണക്കിൽപ്പെടാത്ത പണം 284 കോടിയായി. കാൺപൂരിലെ ജെയിനിന്റെ ആനന്ദ്നഗർ വീട്ടിൽ നിന്ന് 177 കോടി രൂപയും കനൗജിലെ വീട്ടിൽ നിന്ന് 107 കോടി രൂപയും പിടിച്ചെടുത്തതായി ദേശീയ മാദ്ധ്യമം റിപ്പോർട്ട് ചെയ്തു.
ഉത്തർപ്രദേശിലെയും ഗുജറാത്തിലെയും 50 നികുതി ഉദ്യോഗസ്ഥരുടെ സംയുക്ത യൂണിറ്റാണ് കനൗജിൽ കനത്ത സുരക്ഷയ്ക്കിടയിൽ തിരച്ചിൽ നടത്തിയതെന്നാണ് റിപ്പോർട്ട്. സമാജ്വാദി പെർഫ്യൂം പുറത്തിറക്കിയ സമാജ്വാദി പാർട്ടി അനുഭാവി പിയൂഷ് ജെയിനിന്റെ വസതിയിൽ നിന്ന് 250 കിലോ വെള്ളിയും 25 കിലോ സ്വർണവും പിടിച്ചെടുത്തു.
നേരത്തെ അറസ്റ്റിലായ ജെയിനിനെ തുടർനടപടികൾക്കായി കാൺപൂരിലെ ട്രാൻസിറ്റ് കോടതിയിൽ ഹാജരാക്കിയിരുന്നു. റിപ്പോർട്ടുകൾ പ്രകാരം പെർഫ്യൂം വ്യാപാരിക്കെതിരെ ഇഡി കള്ളപ്പണം വെളുപ്പിക്കൽ കേസും ഫയൽ ചെയ്തേക്കാം.
20 പൂട്ടുകളും 15 അലമാരകളും തകർത്താണ് കണക്കിൽപ്പെടാത്ത പണവും സ്വർണവും കണ്ടെടുത്തത്. നിലവറ തുറക്കാൻ ഉദ്യോഗസ്ഥർ ഗ്യാസ് കട്ടർ ഉപയോഗിച്ചു. എന്നാൽ 400 കിലോ പൂർവിക സ്വർണം വിറ്റാണ് കണക്കിൽപ്പെടാത്ത പണം സമാഹരിച്ചതെന്ന് പീയുഷ് ജെയിൻ അവകാശപ്പെട്ടു. നികുതി വെട്ടിപ്പ്, വ്യാജ സ്ഥാപനങ്ങൾ ഉപയോഗിച്ച് ഒന്നിലധികം ഇൻവോയ്സുകൾ സൃഷ്ടിച്ചതിന്റെ പേരിലാണ് ജെയ്നെ അറസ്റ്റ് ചെയ്തതെന്ന് റെയ്ഡ് നടത്തിയ നികുതി ഉദ്യോഗസ്ഥർ അറിയിച്ചു. ഒരു ഉദ്യോഗസ്ഥൻ പറയുന്നതനുസരിച്ച്, ‘നിങ്ങൾക്ക് വേണമെങ്കിൽ, നിങ്ങൾക്ക് ആദായനികുതി കിഴിച്ച് ബാക്കി തിരികെ നൽകാം’ എന്ന് ജെയിൻ പറഞ്ഞു. കേന്ദ്ര ചരക്ക് സേവന നികുതി (സിജിഎസ്ടി) നിയമത്തിലെ സെക്ഷൻ 69 പ്രകാരമാണ് പിയൂഷ് ജെയിനിനെതിരെ കേസെടുത്തിരിക്കുന്നത്. പെർഫ്യൂം വ്യാപാരിയുടെ പരിസരത്ത് ദിവസങ്ങളോളം റെയ്ഡ് നീണ്ടു, ഒന്നിലധികം മെഷീനുകൾ ഉപയോഗിച്ചും എസ്ബിഐ ജീവനക്കാരുടെ സഹായത്തോടെയും കുന്നുകൂടിയ പണം എണ്ണിത്തിട്ടപ്പെടുത്തി.
നേരത്തെ, ഡിജിജിഐയും ആദായനികുതി വകുപ്പും മുംബൈ, കനൗജ്, ഗുജറാത്ത് എന്നിവിടങ്ങളിലെ പിയൂഷ് ജെയിനുമായി ബന്ധപ്പെട്ട നിരവധി സ്ഥലങ്ങളിൽ റെയ്ഡ് നടത്തുകയും ജെയിനിന്റെ കാൺപൂരിലെ വസതിയിൽ നിന്ന് 177 കോടിയോളം വരുന്ന കണക്കിൽപ്പെടാത്ത പണം കണ്ടെടുക്കുകയും ചെയ്തിരുന്നു. പിയൂഷ് ജെയിനിന്റെയും അദ്ദേഹത്തിന്റെ രണ്ട് അടുത്ത പങ്കാളികളുടെയും ഉടമസ്ഥതയിലുള്ള 11 സ്ഥലങ്ങൾ രണ്ട് ദിവസത്തെ തിരച്ചിലിൽ ഉദ്യോഗസ്ഥർ പരിശോധിച്ചു. മുംബൈ, ഗുജറാത്ത്, കനൗജ് എന്നിവിടങ്ങളിൽ വ്യാപിച്ചുകിടക്കുന്ന പിയൂഷ് ജെയിനിന്റെ പെട്രോൾ പമ്പുകളും വസതികളും ഉൾപ്പെടെയുള്ള ഓഫീസുകളിൽ ഐടി, ഡിജിജിഐ ഉദ്യോഗസ്ഥർ സംയോജിത തിരച്ചിൽ നടത്തി.
